«Ak kepderi – parahatçylygyň ilçisi» - ýaş nesiller ýylyň şygaryna bagyşlanan sergide
21-nji fewralda 2025-nji «Halkara parahatçylyk we ynanyşmak ýyly» şeýle-de hemişelik Bitaraplygymyzyň şanly 30 ýyllyk baýramy mynasybetli Döwlet çeperçilik akademiýasynda «Ak kepderi – parahatçylygyň ilçisi» atly döredijilik sergisi guraldy.
Sergide Döwlet çeperçilik akademiýasynyň zehinli talyplarynyň dürli ugurdaky eserleri görkezildi.
Paýtagtymyzyň birnäçe çagalar baglarynyň korpejeleriniň hem-de orta mekdepleriniň okuwçylarynyň sergä gelip onda görkezilen eserler bilen içgin tanyşmaklary ösüp gelýän ýaş nesilleri watançylyk ruhunda terbiýelemekde möhüm ähmiýetli boldy.
Ussat heýkeltaraş, Türkmenistanyň Gahrymany Saragt Babaýewiň döwrebap şäher binagärligimiziň şekil taslamalarynda we şekillendiriş sungatynda parahatçylygy, asudalygy wasp edýän eserler barada çagalara gyzykly gürrüňler bermegi ýatda galyjy pursatlara baý boldy.
Sergi bilen tanyşlygyň dowamynda mugallymlar ýaş nesillere «Halkara parahatçylyk we ynanyşmak ýyly» şygarynyň düýp manysyny giňişleýin düşündirip geçdiler.
ORIENT news
