Aşgabatly mekdep okuwçylary guşlaryň täsin dünýäsi bilen tanyşdyryldy
Halkara guşlar gününiň hormatyna, Türkmenistanyň Döwlet muzeýi Magtymguly adyndaky Ýaşlar guramasy bilen bilelikde fewral aýynda Aşgabat şäheriniň orta mekdepleriniň okuwçylarynyň arasynda guşlara bagyşlanan bäsleşikleri geçirýär. 19-njy fewral, çarşenbe güni Döwlet muzeýi Aşgabat şäheriniň 53-nji orta mekdebinde göçme sergi gurady. Sergide guşlaryň 18 görnüşi gäp görnüşinde, şeýle hem Türkmenistanyň çäginde duş gelýän 14 görnüşiniň fotosuratlary görkezildi.
Muzeýiň ylmy işgärleri mekdep okuwçylaryna bu baýramyň taryhy, ýurdumyzda ýaşaýan käbir guş görnüşleri we guşlaryň durmuşyndaky gyzykly wakalar barada gürrüň berdiler. Berlen maglumatlaryň esasynda mekdep okuwçylarynyň arasynda guşlaryň görnüşleri, taryhy maglumatlary we biologik aýratynlyklary bilen baglanyşykly test görnüşinde bäsleşik geçirildi. Bäsleşikde iň gowy netijeleri görkezen 20 okuwça Döwlet muzeýiniň tebigat we ülkäni öwreniş bölüminiň sergi zalyndaky guşlar ekspozisiýasy bilen tanyşmaga hem-de bäsleşigiň ikinji tapgyryna gatnaşmaga mümkinçilik döredildi.
Halkara guşlar güni – her ýyl 1-nji aprelde bellenilýän ekologiýa baýramydyr. Onuň esasy maksady guşlaryň görnüş köpdürlüligini we sanyny gorap saklamakdan ybaratdyr. Guşlar biologik ekoulgamda möhüm orun eýeleýär. Islendik görnüşiň ýitip gitmegi tebigy deňagramsyzlyga sebäp bolup, bizi ekologiýa betbagtçylygyna has golaýlaşdyryp biler.
Guşlaryň umumy gününi geçirmek pikiri bilim, ylym we medeniýet meseleleri boýunça Birleşen milletler guramasyna – ÝUNESKO degişlidir. Halkara Guşlar güni mynasybetli kitaphanalar we beýleki medeniýet edaralary sergileri, surat bäsleşiklerini, ekologiýa terbiýesine gönükdirilen bilim beriji çäreleri guraýarlar.
ORIENT
