Ykdysady ösüş, parahatçylyk we bitaraplygyň özarabaglanşygy BSG-niň merkezi edarasynda ara alnyp maslahatlaşyldy
17-nji fewralda Türkmenistanyň Ženewadaky Hemişelik wekilhanasy “Interpeace Building” ulgamy bilen bilelikde Bütindünýä Söwda Guramasynyň (BSG) merkezi edarasynda “Söwda arkaly durnuklylygy ýokarlandyrmak: Durnukly parahatçylygyň bähbidine bilelikdäki hereketler” atly çäräni gurady. Çärä ykdysady ösüş, durnukly parahatçylyk we bitaraplyk ýörelgeleriniň arasyndaky gatnaşyklaryň esasy mowzugyny ara alyp maslahatlaşmak üçin halkara guramalarynyň, köpçülikleýin habar beriş serişdeleriniň we hususy pudagyň ýokary derejeli wekilleri gatnaşdy.
Türkmenistanyň diplomatik wekilhanasynyň habaryna görä, BSG-niň Baş direktory doktor Ngozi Okonjo-Iweala çärä gatnaşyjylara wideo ýüzlenmesini iberdi. Sessiýa gatnaşýan Somaliniň premýer-ministriniň orunbasary Salah Ahmed Jama öz çykyşynda dawalardan soňky sebitlerde durnuklylygy we ynanyşmagy berkitmek üçin strategiki maýa goýumlarynyň we durnukly işewürlik usullarynyň ähmiýetini nygtady.
Çäräniň dowamynda Türkmenistanyň Adatdan daşary we Doly ygtyýarly ilçisi Wepa Hajiýew öz çykyşynda, BMG-niň Baş Assambleýasynyň, Türkmenistanyň başlangyjy bilen 2025-nji ýyly “Halkara parahatçylyk we ynanyşmak ýyly” diýip yglan edendigini belläp geçdi. Türkmenistanyň Bitaraplygynyň 30 ýyllygy ýurduň parahatçylykly hyzmatdaşlyk, ykdysady integrasiýa we durnukly ösüş ýörelgelerine ygrarlygyny tassyklaýandygyny nygtady. Türkmenistanyň tejribesi bitaraplygyň üzňelik manysyny aňlatmaýandygyny, halkara hyzmatdaşlygy we durnukly söwda üçin amatly şertleri döredýändigini görkezýär.
Söhbetdeşligiň dowamynda Halkara söwda merkeziniň (HSM), Halkara söwda edarasynyň (HSE) we öňdebaryjy hususy kompaniýalaryň wekilleri parahatçylygy goraýyş başlangyçlaryna hem-de söwda-ykdysady hyzmatdaşlyga işewürligiň ganaşmagyny giňeltmek üçin amaly ädimleri ara alyp maslahatlaşdylar.
Bu çäre dürli pudaklaryň wekillerine durnuklylygy güýçlendirmek we işewürligi parahatçylygy we durnuklylygy üpjün etmek mehanizmlerini ara alyp maslahatlaşmaga mümkinçilik berýän pikir alyşmak, öňdebaryjy tejribäni we strategiýany ösdürmek üçin esasy meýdança bolup hyzmat etdi. Ýurduň bitaraplygynyň 30 ýyllygy mynasybetli, Türkmenistan dürli halkara ýerlerinde parahatçylyk, ynanyşmak we özara peýdaly ykdysady hyzmatdaşlyk ýörelgelerini işjeň wagyz edýär we bitaraplygyň durnukly ösüşi üpjün etmek üçin güýçli guraldygyny görkezýär.
ORIENT
