Daşary ýurtlylara Mekge we Medinede gozgalmaýan emläge maýa goýmaga rugsat berildi
Saud Arabystanyn Patyşalygynyň häkimiýetleri ilkinji gezek daşary ýurtly maýadarlara musulmanlar üçin mukaddes Mekge we Medine şäherlerinde gozgalmaýan emläge maýa goýmak hukugyny berdiler. Ýöne şeýle maýadarlar üçin käbir çäklendirmeler giriziler diýip, ýurduň Maýa bazarlaryny dolandyryş müdirligi (CMA) habar berdi.
Bu karar daşary ýurtlylara bu şäherlerde gozgalmaýan emläge eýeçilik edýän köpçülikleýin açyk kompaniýalaryň paýnamalaryna maýa goýmak mümkinçiligini berýär. Şeýle-de bolsa, daşary ýurt maýalarynyň şol kompaniýalardaky umumy paýy 49%-den geçmeli däldir. Bu bolsa daşary ýurtly maýadarlaryň kompaniýalary doly gözegçilikde saklap bilmejekdigini aňladýar. Mundan başga-da, olar diňe paýnamalara we belli bir görnüşli gymmat bahaly kagyzlara maýa goýmaga hukukly bolarlar.
Bilermenleriň pikiriçe, bu karar CMA tarapyndan daşary ýurt maýalaryny çekmek, maýa goýumlaryň mukdaryny artdyrmak, maliýe bazarynyň bäsdeşlige ukyplylygyny ýokarlandyrmak we ýurduň ykdysady ösüşine goldaw bermek maksady bilen kabul edildi. Şeýle hem, Mekge we Medinedäki häzirki we geljekki taslamalar üçin daşary ýurt maýalaryny çekmek, olaryň maliýeleşdirilmegini Saud Arabystanyn Patyşalygynyň maliýe bazary arkaly üpjün etmek maksat edinilýär.
Mekge we Medinedäki gozgalmaýan emläk taslamalary uly girdeji getirýän maýa goýumlarynyň biri hasaplanýar, sebäbi bu şäherler musulmanlaryň köpçülikleýin zyýarat edýän mukaddes ýerleri bolup durýar. Häzirki wagtda Saud Arabystan Patyşalygynyň gozgalmaýan emläk bazary çalt ösýär. Ýurtda dünýäniň iň iri 7 taslamasynyň üçüsi gurulýar, şolaryň biri Mekgedäki ägirt uly myhmanhana taslamasydyr.
ORIENT
