BMG-niň Ösüş Maksatnamasynyň Türkmenistandaky edarasy hem-de hyzmatdaşlar salgyt düzgünleşdirmeleri we BSG düzgünleri boýunça webinar geçirdi
BMG-niň Ösüş Maksatnamasynyň Türkmenistandaky edarasy “DÖM durmuşa geçirmek üçin platforma, III döwür” atly Türkmenistanyň Maliýe we ykdysadyýet ministrligi bilen bilelikdäki taslamasynyň çäklerinde “Salgyt düzgünleşdirmeleri we Bütindünýä söwda guramasynyň düzgünleri: töwekgelçilikleri azaltmak üçin amaly maslahatlar” atly mowzuk bilen webinar geçirdi.
Webinaryň barşynda gatnaşyjylar BSG çäklerinde salgyt salma meseleleri, şol sanda salgyt salma ulgamynda has amatly şert tertibiniň we milli tertibiň ýörelgelerini ulanmagyň çäklerinde olar bilen tanyş boldular. BSG-ä taze agzalaryň goşulşmagynyň şertlerinde salgytlar boýunça goşmaça borçnamalar giňişleýin seljerildi. Gatnaşyjylar täze salgyt kanunçylygyny işläp taýýarlamak işinde BSG düzgünleriniň bozulmagynyň we bu düzgünleriň salgyt dolandyryşda ulanmak tejribesinde töwekgelçilikleri azaltmak usullaryny öwrendiler. Mundan başga-da, Türkmenistanyň Bütindünýä saglyk guramasyna goşulyşmagynyň çäklerinde salgyt salma ulgamynda milli özbaşdaklygyň üpjün edilmeginiň we pugtalandyrylmagynyň strategiýasy hödürlenildi.
“Salgyt salma ulgamy – inçe bir ulgam bolup, onda islendik bir kararlaryň we halkara borçnamalaryň düýpli ykdysady we jemgyýetçilik netijeleri bolup bilýär. BSG düzgünlerini, olaryň ulanyş tejribesini bilmek, töwekgelçiliklere hem-de beýleki goşulşan ýurtlaryň ýalňyşlyklaryna düşünmek BSG-ä goşulyşmak işinde Türkmenistanyň milli bähbitlerini goramak üçin öňünden güýçli gepleşikler garaýşy barada pikirlenmäge hem-de ony taýýarlamaga mümkinçilik berer” – diýip, BMG-niň Ösüş Maksatnamasynyň halkara bilermeni hanym Anait Smbatýan belledi.
Çärä Türkmenistanyň dürli ministrlikleriniň we pudaklaýyn dolandyryş edaralarynyň, Türkmenistanyň Merkezi bankynyň hem-de Türkmenistanyň Senagatçylar we telekeçiler birleşmesiniň wekilleri gatnaşdy.
ORIENT news
