Türkmenistanyň Hemişelik wekili BMG-niň Ženewadaky edarasynyň ýolbaşçysynyň diplomatlar bilen geçiren duşuşygynda çykyş etdi
28-nji ýanwarda BMG-niň Ženewadaky edarasynda diplomatik gullugynyň we halkara guramalarynyň wekilhanalarynyň ýolbaşçylary bilen duşuşyk geçirildi.
BMG-niň Ženewadaky edarasynyň baş ýerine ýetiriji direktory Tatýana Walowaýa (UNOG - United Nations Office at Geneva) tarapyndan gurnalan bu çärä, Türkmenistanyň UNOG-niň ýanyndaky Hemişelik wekili Wepa Hajiýew hem gatnaşdy.
Bu çäre jemgyýetçilik we hökümete dahylsyz guramalaryň, köpçülikleýin habar beriş serişdeleriniň hem-de ylmy intelligensiýanyň wekillerini bir ýere jemledi.
Tatýana Walowaýa hyzmatdaşlygyň geljeginiň mümkinçiliklerini gysgaça beýan etdi hem-de häzirki zaman şertlerde parahatçylygy we dialogy saklamagyň möhümdigini belledi. Ol döwletleriň arasyndaky ynanyşmagy berkitmekde köpçülikleýin tagallalaryň ähmiýeti barada aýtdy hem-de bu maksatlara ýetmekde köptaraplaýyn diplomatiýanyň ornyna ünsi çekdi.
Soňra BMG-niň ýanyndaky Parahatçylyk uniwersitetiniň (UPEACE) we Ženewadaky beýleki halkara guramalaryň Hemişelik synçysy Dewid Fernandes Puýana çykyş etdi. Ol öz çykyşynda esasanam bu agyr döwürlerde parahatçylygyň, ynanyşmagyň we dialogyň ähmiýeti barada aýtdy. Aýratynam Türkmenistanyň bu gymmatlyklary gorap saklamakdaky goşandyny belläp geçdi.
Puýana Türkmenistanyň başlangyjy bilen BMG-niň Baş Assambleýasynyň degişli Kararnamasyna laýyklykda 2025-nji ýylyň “Halkara parahatçylyk we ynanyşmak ýyly” diýlip yglan edilendigini belledi hem-de bu başlangyjyň halkara jemgyýetçiligi üçin ähmiýetini nygtady.
Türkmenistanyň BMG-niň Ženewadaky edarasynyň ýanyndaky Hemişelik wekili Wepa Hajiýew öz çykyşynda parahatçylyk we ynanyşmak mowzugynyň ähmiýetine ünsi çekdi. Ol duşuşyga gatnaşanlary Türkmenistanyň bu ugurda alyp barýan işleri barada giňişleýin tanyşdyrdy we BMG Baş Assambleýasynyň Kararnamalary bilen birnäçe gezek berkidilen, 2025-nji ýylda ýurduň hemişelik Bitaraplygynyň 30 ýyllygynyň belleýändiginiň aýratyn mana eýedigini nygtady.
Ilçi Hajiýew şeýle hem Türkmenistanyň Bitaraplygy dialogy ösdürmegiň, halkara hyzmatdaşlygyny pugtalandyrmagyň we durnukly parahatçylygy üpjün etmegiň binýady bolup durýandygyny nygtady.
Bu çäre hyzmatdaşlygyň geljegini ara alyp maslahatlaşmak, pikir alyşmak we döwletler bilen halkara guramalaryň arasynda dialogy berkitmek üçin möhüm meýdança boldy. Duşuşyga gatnaşyjylar ählumumy derejede parahatçylygy, ynanyşmagy we durnuklylygy saklamak boýunça umumy tagallalara ygrarlydyklaryny ýene bir gezek tassykladylar.
ORIENT
