Tokioda Türkmenistan bilen Ýaponiýanyň arasyndaky hyzmatdaşlyk meselesine garaldy
Tokioda iki ýurduň Daşary işler ministrlikleriniň arasynda türkmen-ýapon syýasy geňeşmeleri geçirildi. Türkmen tarapyna Daşary işler ministriniň orunbasary Ahmet Gurbanow, ýapon tarapyna Ýaponiýanyň DIM-niň Merkezi Aziýa we Kawkaz ýurtlary boýunça ýörite wekili Masaki Işikawa ýolbaşçylyk etdi.
27-nji ýanwarda geçirilen duşuşygyň dowamynda Türkmenistanyň we Ýaponiýanyň arasyndaky gatnaşyklaryň ikitaraplaýyn gün tertibiniň ähli toplumy boýunça okgunly ösdürilýändigi nygtaldy. “Merkezi Aziýa+Ýaponiýa” dialogyna gatnaşyjy ýurtlaryň ilkinji sammitiniň geçirmek bilen baglanyşykly meselelere garaldy.
Ikitaraplaýyn gatnaşyklaryň ileri tutulýan ugurlary, halkara syýasatyň gyzyklanma bildirilýän wajyp meseleleri boýunça pikir alşyp, taraplar iki ýurduň özara hyzmatdaşlygyny, şol sanda ony abraýly halkara guramalaryň, hususan-da BMG-niň çäklerinde giňeltmäge ygrarlydygyny tassykladylar. Şeýle hem BMG-niň Baş Assambleýasynyň Türkmenistanyň başlangyjy bilen 2025-nji ýyly “Halkara parahatçylyk we ynanyşmak ýyly” diýip yglan etmek hakynda Kararnamasyna üns çekildi diýip, Türkmenistanyň DIM-niň metbugat beýanatynda habar berilýär.
Söwda-ykdysady ugurda ikitaraplaýyn hyzmatdaşlyga aýratyn üns berip, taraplar häzirki wagtdaky taslamalar we olary durmuşa geçirmek bilen bagly meseleleri ara alyp maslahatlaşdylar. Nebit-gaz we gazhimiýa pudagynda, elektroenergetika, ulag we beýleki ulgamlardaky hyzmatdaşlygyň oňyn tejribesi bellenildi. Şunda hyzmatdaşlygyň bar bolan uly kuwwatyny iş ýüzünde durmuşa geçirmäge ýardam bermäge gönükdirilen bilelikdäki komitetiniň işine uly ähmiýet berilýär.
Taraplar şeýle hem Osaka şäherinde geçiriljek “EKSPO – 2025” Bütindünýä sergisine türkmen tarapynyň gatnaşmagy hem-de onuň çäklerinde 2025-nji ýylyň 14-nji aprelinde guraljak Türkmenistanyň Milli gününi bellemek bilen bagly meseleleri hem ara alyp maslahatlaşdylar.
Şol gün Türkmenistanyň Daşary işler ministriniň orunbasary Ahmet Gurbanow bilen Ýaponiýanyň Daşary işler boýunça döwlet ministri Hisaýuki Fudziiniň arasynda duşuşyk geçirildi.
Duşuşygyň dowamynda syýasy-diplomatik, söwda-ykdysady we medeni-ynsanperwer ugurlarda türkmen-ýapon hyzmatdaşlygynyň häzirki ýagdaýy we geljegi barada pikir alyşyldy. Taraplar dürli meseleler boýunça hyzmatdaşlygy mundan beýläk hem berkitmäge taýýardyklaryny tassykladylar.
Döwletara gatnaşyklary ösdürmekde ýokary we iň ýokary derejedäki saparlaryň ähmiýeti nygtaldy.
Türkmenistanyň wekiliýetiniň Ýaponiýa saparynyň çäklerinde türkmen wekiliýeti bilen Ykdysady hyzmatdaşlyk boýunça ýapon-türkmen komitetiniň başlygy, “Itochu Corporation” kompaniýasynyň direktorlar geňeşiniň agzasy, ýerine ýetiriji wise-prezidenti, Hiroýuki Subaýyň arasynda duşuşyk geçirildi.
Taraplar Ykdysady hyzmatdaşlyk boýunça Türkmen-ýapon we Ýapon-türkmen komitetleriniň 2024-nji ýylyň 16-17-njy dekabrynda Aşgabatda geçirilen mejlisinde gazanylan ylalaşyklary durmuşa geçirmegiň meselelerini ara alyp maslahatlaşdylar.
ORIENT
