Türkmen emini AFK Çempionlar ligasynyň oýnuna bellendi
Türkmenistandan FIFA-nyň emini Resul Mämmedow 17-nji fewralda “Persepolis” (Eýran) bilen “Al-Nasr” (Saud Arabystany) toparlarynyň arasynda geçiriljek 2024-25 AFK Çempionlar ligasynyň toparçasynyň jemleýji oýnuna eminlik etmäge çagyryldy. Bu barada Türkmenistanyň Futbol federasiýasy habar berýär.
Aziýanyň Futbol konfederasiýasynyň kararyna görä Resul Mämmedow bu oýunda ätiýaçdaky emin hökmünde çykyş eder. Duşuşyga FIFA-nyň emini Rustam Litfulliniň ýolbaşçylygyndaky Özbegistandan eminler topary eminlik eder. Oňa Sanjar Şaýusupow we Alişer Usmanow kömekçi emin hökmünde kömek eder. Eminleriň işine Jassim Mohamad Al-Hail (Katar) baha berer, oýnuň komissary wezipesini Çen Liang-Çen (Hytaý Taýpeýi) ýerine ýetirer.
Aşgabatly 33 ýaşly emin Resul Mämmedow – FIFA-nyň tanymal emini Mämmet Mämmedowyň oglydyr. Resul Mämmedow 2023-nji ýyldan bäri halkara oýunlaryna eminlik edýär.
ORIENT
