Kanadanyň Türkmenistanda akkreditlenen Ilçisi öz işine başlady
Türkmenistanyň milli parlamentiniň – Mejlisiniň Başlygy Dünýägözel Gulmanowa şişenbe güni Kanadanyň Türkmenistanda bellenen ilçisi Kristofer Daggandan (oturýan ýeri Astana şäheri) ynanç hatyny kabul etdi.
Duşuşygyň dowamynda Mejlisiň ýolbaşçysy Prezident Serdar Berdimuhamedowyň adyndan ilçini wezipä täze bellenmegi bilen gutlap, şeýle hem Türkmenistan bilen Kanadanyň arasyndaky hyzmatdaşlygy we dostlukly gatnaşyklary ösdürmäge gönükdirilen işinde üstünlikleri arzuw etdi.
Kristofer Daggan öz gezeginde, türkmen döwletiniň ýolbaşçylaryna we ähli türkmen halkyna mähirli salamyny hem-de iň gowy arzuwlaryny beýan etdi. Diplomat Kanadanyň General-gubernatory Meri Meý Saýmonyň Prezident Serdar Berdimuhamedowa iberen ynanç hatyny gowşurdy, onda Kristofer Dagganyň başarnyklary we yhlasy “öz üstüne ýüklenilen wezipeleri Siziň makullamagyňyza we hormatyňyza mynasyp derejede ýerine ýetirjekdigine ynam döredýär” diýip, beýan edilýär.
Duşuşygyň dowamynda Dünýägözel Akmuhammedowna Kanadanyň ilçisini Türkmenistanyň içeri we daşary syýasatynyň ileri tutulýan ugurlary şeýle hem milli parlamentiň ýurduň kanunçylygyny döwrebaplaşdyrmak boýunça alnyp barýan işleri bilen giňişleýin tanyşdyrdy.
Kanadanyň ilçisi, wekilçilik edýän ýurdunyň Türkmenistan bilen hyzmatdaşlygy pugtalandyrmaga we ösdürmäge uly gyzyklanma bildirýändigini aýtdy. Taraplar söhbetdeşligiň dowamynda syýasy-diplomatik, ykdysady, medeni gatnaşyklaryň, şeýle hem parlamentara hyzmatdaşlygyň geljegini ara alyp maslahatlaşdylar.
Kanadanyň Türkmenistandaky Adatdan daşary we Doly ygtyýarly ilçisi iki ýurduň arasyndaky dostlukly gatnaşyklary berkitmek işinde ähli gujur-gaýratyny gaýgyrmajakdygyna ynandyrdy.
Şeýle hem şol gün Türkmenistanyň Daşary işler ministriniň orunbasary Ahmet Gurbanow bilen ilçi Kristofer Dagganyň arasynda duşuşyk geçirdi. Ilçi ynanç hatlarynyň nusgalaryny gowşurdy.
ORIENT
