Türkmenistan we Yrak gaz üpjünçiligi boýunça esasy ylalaşyga gol çekdiler
Şenbe güni Yragyň Energetike ministri Ziad Ali Fadel Türkmenistan bilen gündelik 20 million kub metr gaz iberilmegini üpjün etmek baradaky ylalaşyga gol çekilendigini habar berdi.
Fadel öz çykyşynda bu gaz akymynyň ýurduň elektroenergetika infrastrukturasyny gowulandyrmakda möhüm orny eýelejekdigini aýtdy: “Daşary ýurtlardan getirilýän gazyň mukdary, gaz bilen işleýän elektrik stansiýalarymyzyň doly işlemegini, milli ulgamyň durnuklylygyny üpjün eder”.
Fadel, Şweýsariýada ýerleşýän “Loxstone Energy” bilen hyzmatdaşlykda alyş-çalyş mehanizminiň bir bölegi hökmünde Türkmenistandan gazyň Eýranyň turbageçiriji ulgamy arkaly Yraga iberiljekdigini düşündirdi.
“Bu ylalaşyga gol çekişmek, köp sanly duşuşygy, özara saparlary we geçen ýyl özara düşünişmek hakynda Ähtnama gol çekilmegini öz içine alýan bir ýyldan gowrak ýokary derejedäki tehniki tagallanyň jemidir” – diýip, ministr sözüniň üstüni ýetirdi, bu barada “Shafaq News” habar berýär.
Türkmenistan Döwlet ministri – “Türkmengaz” DK başlygy Maksat Babaýew resmi sapar bilen Bagdada bardy we saparyň çäginde Premýer-ministriň energetika meselesi boýunça orunbasary, Yragyň Nebit ministri Haýan Abdul Gani bilen duşuşdy.
Yragyň habarlar agentliginiň (INA) Yragyň Nebit ministrligine salgylanyp, beren habarynda, duşuşygyň nebit we energetika pudaklarynda bilelikdäki hyzmatdaşlygyň gözýetimlerini giňeltmek meselesini ara alyp maslahatlaşandygyny, şol bir wagtyň özünde Yrak bilen Türkmenistanyň bu ugurlarda uly mümkinçilikleriniň bardygyny bellediler – diýip, aýdylýar.
ORIENT news
