Malaýziýanyñ Daşary işler ministri Aşgabada resmi sapar bilen geldi
9-njy sentýabr, duşenbe güni Türkmenistanyñ Daşary işler ministri Raşid Meredow öz ýurdunyñ wekiliýetine ýolbaşçylyk etmek bilen Aşgabatda resmi saparda bolýan Malaýziýanyñ Daşary işler ministri Mohamad Hasan bilen duşuşdy.
"Taraplar özara hormat goýmak we özara bähbitli ýörelgelerine esaslanýan uzak ýyllap dowam edip gelýän hyzmatdaşlygy mundan beýläk hem ösdürmek meselelerini ara alyp maslahatlaşdylar. Syýasy-diplomatik ugrundan, şol sanda BMG, YHG ýaly halkara guramalarynyñ çäklerindäki hyzmatdaşlyk meselelerine hem garaldy" - diýip, türkmen DIM-niñ habarlar gullugynda aýdylýar.
Şeýle-de habarda diplomatlaryñ sebit we halkara gün tertibindäki birnäçe ugurlar boýunça garaýyşlarynyñ gabat gelýändigi barada bellenilýär.
Duşuşygyñ dowamynda ministrler söwda-ykdysady, ylym, medeniýet we syýahatçylyk pudaklarynda hyzmatdaşlyk meselelerini ara alyp maslahatlaşdylar.
Malaýziýanyñ Daşary işler ministri iki ýurduñ arasyndaky diplomatik we ykdysady gatnaşyklary pugtalandyrmak maksady bilen 9-10-njy sentýabr aralygynda Türkmenistana resmi saparyny amala aşyrýar. Saparyñ çäklerinde ministriñ ýokary derejede kabul ediljegine garaşylýar diýip, Malaýziýanyñ DIM-niñ habarlar gullugy habar berýär. Mohamad Hasanyñ saparynyñ öňüsyrasynda 9-njy sentýabrda Aşgabatda Malaýziýanyñ we Türkmenistanyñ arasynda ýokary wezipeli wekilleriniñ derejesindäki bäşinji ikitaraplaýyn syýasy geñeşmeleri geçirildi.
Malaýziýanyñ DIM-niñ berÿän maglumatyna görä, 2023-nji ýylda Malaýziýanyñ söwda hyzmatdaşlarynyñ arasynda Türkmenistan dördünji orny eýeläp, söwdanyñ jemi möçberi 10,57 mln amerikan dollara barabar boldy.
ORIENT news
