Ýaponiýanyň banknotlarynda täze ýüzler peýda boldy
Nagt däl töleglere gönükdirilen ählumumy işleriň döwründe, nagt ulanmak däbine wepaly bolup galýan Ýaponiýa soňky 20 ýylda ilkinji gezek üç sany täze banknot çykardy. Täze banknotlar, galplygy kynlaşdyrýan özboluşly gologrammalar bilen üpjün edilendir, NHK World Japan habar berýär.
10000 ýen banknotda filosof Fukudzawa Ýukuçiniň ornuna maliýeçi Şibusawa Eýiti şekili ýerleşdirilen. Bu pul birligiň banknotlarynyň dizaýnynda soňky 40 ýylda ilkinji üýtgeşme. 5000 ýen banknotda ýazyjy Higuti Itiýo pedagog Tsuda Umeko, 1000 ýen banknotda bolsa bakteriolog Noguti Hideýonyň ýerine başga bir meşhur bakteriolog Kitasato Şibasaburonyň şekili peýda boldy. Bu banknotlar 20 ýyl bäri dolanyşykda bolan öňki banknotlary çalyşdy.
Şibusawa Eýiti
Häzirki zaman Ýaponiýanyň ykdysadyýetiniň atasy hökmünde tanalýan Şibusawa Eýiti XIX-XX asyryň başynda köp banklaryň we kompaniýalaryň döremeginde möhüm orun eýeledi. Ýaponiýanyň iň soňky sýoguny Tokugawa Ýoşinobu hyzmat etdi we Meýdzide geçirilen dikeldiş işlerinden soň täze hökümetde işledi. Şibusawa soňra Ýaponiýanyň ilkinji milli bankyny döretdi we banklar, demir ýollar we dokma kompaniýalary ýaly 500-e golaý işlere gatnaşdy. Şeýle hem, Hitotsubaşi uniwersiteti ýaly birnäçe ýokary okuw mekdepleriniň döredilmegine goşant goşdy.
Tsuda Umeko
Tsuda Umeko Ýaponiýada zenanlar biliminiň öňdebaryjysy bolupdyr. 1871-nji ýylda, alty ýaşynda Ýaponiýanyň ilçisi Iwakura Tomomi bilen ABŞ-a gitdi we daşary ýurtda bilim alan ilkinji ýapon zenanlarynyň biri boldy. Ýaponiýa gaýdyp gelen Tsuda, häzirki wagtda Tsuda uniwersiteti diýlip atlandyrylýan instituty esaslandyrdy hem-de ýurtda zenanlaryň ýagdaýyny gowulaşdyrmak we iňlis diliniň öwredilişini ösdürmek üçin uly işleri bitiripdir.
Kitasato Şibasaburo
Ýaponiýada häzirki zaman lukmançylygynyň atasy hökmünde tanalýan Kitasato Şibasaburo ýokanç keselleriň öňüni almakda möhüm goşant goşdy. Germaniýada meşhur bakteriolog Robert Koh bilen bile okap, arassaçylyk medeniýetleri ösdürmegiň we tetanozyň garşysyna serum bilen bejergini ösdürmegiň usullaryny işläp düzdi.
Ýaponiýanyň Döwlet çaphana gullugy banknotlarda şekillendirilen şahsyýetleriň ýapon halkyna gowy tanalmalydygyna we olara buýsanç duýgusynyň bolmalydygyna çagyrýar. Täze banknotlardaky ýerleşdirlen şekiller diňe bir medeni mirasy görkezmek bilen çäklenmän, galplygy hasam kynlaşdyrýar. Däp bolşy ýaly, banknotlarda Ito Hirobumi we Iwakura Tomomi ýaly syýasy şahsyýetler bar. Şeýle-de bolsa, soňky ýyllarda Meýdzi döwrüniň (1868-1912) medeniýetiniň wekillerine artykmaçlyk berildi we dalaşgärleriň saýlanmagy Maliýe ministrligi, Ýaponiýanyň banky we Döwlet çaphana gullugy bilen maslahatlaşandan soň maliýe ministri tarapyndan tassyklandy.
ORIENT news
