Belgiýa Patyşalygynyň futbol assosasiýasy türkmen tälimçilerine we oýunçylaryna tälim bererler
Belgiýa Patyşalygynyň Futbol Assosasiýasy öz tejribesini türkmen kärdeşleri bilen paýlaşmaga taýyn. Resmi gatnaşyklary ýola goýmak we iki ýurduň futbol federasiýalarynyň arasynda hyzmatdaşlyk üçin berk esas döretmek mümkinçilikleri Türkmenistanyň Brýusseldäki ilçisi Sapar Palwanow bilen RBFA-nyň (Royal Belgian Football Association) direktory Peters Willems ara alnyp maslahatlaşdy.
Esasy üns taraplaryň futbol federasiýalarynyň arasynda ilkinji aragatnaşygy ýola goýmaga berildi. Aşakdaky möhüm ugurlary öz içine alýan bilelikdäki taslamalary durmuşa geçirmegiň mümkinçilikleri göz öňünde tutuldy:
Belgiýada türkmen tälimçilerini taýýarlamak: bu başlangyç Belgiýada geçirjek okuw meýilnamalary arkaly türkmen tälimçileriniň hünärlerini we bilimlerini ýokarlandyrmaga gönükdirilen.
Belgiýaly hünärmenleri Türkmenistana ibermek: Belgiýanyň futbol hünärmenleri ýerli tälimçiler we oýunçylar üçin ýerinde tälim we hünär derejesini ýokarlandyrmak üçin Türkmenistana iberilip bilner.
Futbol klubynyň direktorlaryny taýýarlamak: bu maksatnama ýaşlar we professional klublara gönükdirilip, Türkmenistanda futbol klublarynyň direktorlary üçin okuwy öz içine alar.
Belli bir oýunlara türkmen oýunçylaryny taýýarlamak: bu ugur, Belgiýanyň tälimçileriniň tejribesini ulanyp, türkmen oýunçylaryny geljekki oýunlara taýýarlamak üçin ýöriteleşdirilen okuw türgenleşik sapaklaryny geçirmegi öz içine alýar.
Duşuşykda Türkmenistanda futbolyň derejesini ýokarlandyrmaga we iki ýurduň futbol jemgyýetleriniň arasyndaky gatnaşyklary berkitmäge gönükdirilen ikitaraplaýyn hyzmatdaşlygyň geljegi we özara peýdalary bellenildi.
“Geljekki ädimler hyzmatdaşlygyň aýry-aýry ugurlaryny ara alyp maslahatlaşmak, ikitaraplaýyn şertnamalary baglaşmak we biziň ýurtlarymyzda futboly ösdürmäge gönükdirilen bilelikdäki taslamalary meýilleşdirmek üçin wideo konferensiýalary we ýüzbe-ýüz ýygnaklary guramagy öz içine alýar” – diýip, Türkmenistanyň Brýusseldäki wekilhanasynda bellenildi.
Belgiýa Patyşalygynyň Futbol Assosasiýasy – Belgiýada futbola gözegçilik edýän we dolandyrýan guramadyr. Merkezi edarasy Brýusselde ýerleşýär. Belgiýa Patyşalygynyň Futbol Assosasiýasy 1895-nji ýylda esaslandyryldy we FIFA (1904-nji ýylda) we UEFA (1954-nji ýylda) esaslandyryjy agzalaryň biri boldy.
Assosiasiýa çäreleri guraýar we milli futbol toparlaryny (erkekler, zenanlar, ýaşlar) dolandyrýar. Assosasiýanyň howandarlygynda Belgiýanyň erkekleriň we zenanlaryň arasynda çempionaty, beýleki köp sanly ýaryşlar geçirilýär.
Mundan ozal Türkmenistanyň Futbol Federasiýasy bilen Niderlandlar Patyşalygynyň Futbol Birleşiginiň arasynda ilkinji wideo duşuşygy geçirilipdi.
ORIENT news
