Paýtagtymyzda DÝHG-niň agza döwletleriň demirýol ulaglary edaralarynyň ýolbaşçylarynyň we jogapkär wekilleriniň maslahatynyň mejlisi öz işine başlady
Aşgabatda Demirýollaryň hyzmatdaşlygy guramasynyň (DÝHG) agza döwletleriniň demirýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisi öz işine başlady.
Paýtagtymyzdaky bu iri çärä ýurdumyzyň wekiliýeti bilen bir hatarda 21 ýurtdan: Russiýa Federasiýasyndan, Belarusdan, Özbegistandan, Gazagystandan, Gyrgyzystandan, Täjigistandan, Eýrandan, Owganystandan, Hytaýdan, Mongoliýadan, KHDR-den, Koreýa Respublikasyndan, Laosdan, Azerbaýjandan, Gruziýadan, Estoniýadan, Latwiýadan, Polşadan, Çehiýadan, Slowakiýadan, Wengriýadan wekiliýetler gatnaşdylar.
Forum 15-nji aprelden 19-njy aprel aralygynda “Ýyldyz” myhmanhanasynyň mejlisler jaýynda geçýär. Bu gün bu ýerde mejlisiň açylyş dabarasy boldy. Aýdym-sazly çykyşdan soňra, hormatly Prezidentimiz Serdar Berdimuhamedowyň mejlise gatnaşyjylara iberen gutlagy okaldy. Onda döwlet Baştutanymyz Türkmenistanyň ulag-üstaşyr geçelgeleri ösdürmekde we bu ugurda BMG-niň we beýleki iri halkara guramalaryň çäklerindäki hyzmatdaşlykda işjeň orun eýeleýändigini belledi.
Hormatly Prezidentimiz uly ähmiýete eýe bolan bu mejlisiň geçýän günlerinde, ýagny, şu ýylyň 16-njy aprelinde ABŞ-nyň Nýu-Ýork şäherinde Birleşen Milletler Guramasynyň Baş Assambleýasynyň Durnukly ösüş hepdeliginiň geçirilýändigini we onuň çäginde Türkmenistanyň başlangyjy bilen döredilen Durnukly ulagyň dostlary toparynyň ministrler derejesindäki duşuşygynyň hem-de durnukly ulag boýunça ýokary derejeli mejlisiň geçirilýändigini aýratyn belledi.
“Türkmenistan 1994-nji ýyldan bäri Demir ýollaryň hyzmatdaşlygy guramasynyň agzasy bolmak bilen, milli derejede demir ýol ulagy düzümleriniň sazlaşykly ösdürilmegi, sebit derejesinde utgaşykly ulag syýasatynyň amala aşyrylmagy esasynda halkara üstaşyr ýükleri daşamagyň ugurlaryny giňeltmek babatda tagalla edýär” diýlip Gutlagda beýan edilýär. Ýygnanlaryň öňünde döwlet Baştutanymyzyň adyndan Gutlagy Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş dirketory Mämmethan Çakyýew okady.
Soňra DÝHG-niň agza döwletleriň demirýol ulaglary edaralarynyň wekiliýetleri mejlisiň gün tertibine girizilen meselelere garadylar.
Forumyň öňýanynda Demirýollaryň hyzmatdaşlygy guramasynyň başlygy Miroslaw Antonowiçiň ORIENT-e beren interwýusynda belleýşi ýaly, mejlise gatnaşyjylaryň öňünde aragatnaşygyň ählumumy ulgamy hökmünde demirýollary, ýük we ýolagçy daşamalary, infrastrukturany kämilleşdirmek, pudagy sanlylaşdyrmak boýunça ylalaşyklary, çözgütleri kabul etmek wezipeleri durýar.
Şeýle hem mejlise gatnaşyjylar demirýol ulagynyň ekologiýa taýdan arassalygyny nazara almak bilen, Guramanyň geljek üçin ösüş strategiýasyny kesgitlärler.
Delegatlar maksatlaýyn toparlaryň demirýol hereketiniň infrastrukturasy we gurluşy, demirýollaryň arasynda özara hasaplaşyklaryň tertibi we bergileri kadalaşdyrmak mehanizmi ýaly ugurlar boýunça 2023-nji ýylda ýerine ýetiren işleriniň jemlerini jemlärler.
ORIENT news
