Aşgabatda türkmen we owgan zenan telekeçileriniň duşuşygy geçirildi
Türkmenistanyň Söwda-senagat edarasynyň geçirilýän owgan harytlarynyň we Türkmen-owgan işewürler forumynyň çäklerinde iki ýurduň zenan telekeçileriniň duşuşygy geçirildi.
Ozal habar berlişi ýaly, goňşy ýurduň senagat we söwda ministri Nurduddin Aziziniň ýolbaşçylygyndaky söwda-ykdysady wekiliýetiniň düzüminde 15 zenan işewür bar.
Olaryň hatarynda Owganystanyň Söwda-senagat palatasynyň zenan işewürleriň bähbitlerini goraýan ýolbaşçylar, azyk senagatyna, haly, şaý-sep, deri we senetçilik önümlerine ýöriteleşen kompaniýalaryň dolandyryjylary bar.
Owgan zenanlar toparyna başlyklyk edýän Feriba Naseri öz işewürligi we wekiliýetiň her bir agzasynyň alyp barýan işi barada aýdyp berdi.
Senagatçylar we telekeçiler birleşmesinde we Söwda-senagat edarasynda işleýän zenanlar türkmen tarapyna wekilçilik etdi.
Türkmen tarapyndan duşuşyga gatnaşanlaryň hatarynda halyçylyk, moda we gözellik, gülçülik, şaý-sep, maglumat tehnologiýalary ugurlarynda iş alyp barýan işewür zenanlar bar.
Halkara zenanlar gününiň öňüsyrasynda geçirilen bu duşuşykda iki ýurduň zenan telekeçileriniň özara tanyşmagy we dürli pudaklar boýunça özara pikir alyşmaklary üçin şertleri döretdi. Gatnaşyjylar özleriniň üstünlikleri, gazananlary we meýilnamalary barada gürrüň berdiler.
Türkmenistanyň Senagatçylar we telekeçiler birleşmesiniň we Owganystanyň Zenanlar söwda-senagat palatasynyň arasynda Ähtnama baglaşmak meselelerine aýratyn üns berildi.
Duşuşygyň ahyrynda türkmenistanly zenan telekeçiler owgan kärdeşlerine ýadygärlik sowgatlary we gülleri gowşurdylar.
ORIENT news
