Söwda-senagat edarasyndaky sergi: owgan önüm öndürijileri Aşgabada näme getirdiler?
Duşenbe güni Aşgabatda owgan harytlarynyň sergisi açyldy. Türkmenistanyň söwda-senagat edarasynyň sergiler merkezinde guralýan çäräniň çäklerinde ilkinji Türkmen-owgan işewürler maslahaty hem guralýar.
“ORIENT-iň” habarçysyna mälim edilişi ýaly, sergä gatnaşmak üçin düzüminde owgan telekeçileri, söwda, ykdysadyýet we beýleki pudak edaralarynyň ýokary derejeli ýolbaşçylarydyr wekilleri bolan owgan wekiliýetiniň uly topary Aşgabada geldi. Goňşy ýurduň wekiliýet toparyna ýurduň senagat we söwda ministri Nuruddin Azizi başlyklyk edýär.
Serginiň açylyş dabarasyna Türkmenistanyň Mejlisiniň Başlygy, Hökümet agzalary, ýurduň ministrlikleriniň we pudaklaýyn dolandyryş edaralarynyň, daşary döwletleriň Türkmenistandaky diplomatik wekilhanalarynyň, jemgyýetçilik guramalarynyň ýolbaşçylary we köpçülikleýin habar beriş serişdeleriniň wekilleri gatnaşdylar.
Sergi zalynda Owganystanyň dürli ugurlarda iş alyp barýan 200-den gowrak hususy kärhanasynyň önümleri görkezildi. Bu ýerde Gündogara mahsus – çaý, gury ir-iýmişler, goşundylar, halylar, şaý-sepler, gymmat bahaly daşlar bilen birlikde gurluşyk, senagat önümleriniň, himiki serişdeleriň, derman senagatynyň önümleri, azyk harytlary we dürli içgiler görkezilýär.
Owgan tarapy Türkmenistan bilen söwda gatnaşyklaryny işjeňleşdirmäge, eksporty artdyrmaga, üstaşyr kuwwatlyklary netijeli ulanmak arkaly öz önümlerini eýleki sebitlere ibermäge, şol bir wagtda türkmen önümleriniň Owganystanyň üsti bilen daşary ýurtlara iberilişinde hyzmatdaşlyk etmäge taýýardyr. Bu barada Owanystanyň senagat we söwda ministriniň wezipesini ýerine ýetiriji Nuruddin Aziziniň Senagatçylar we telekeçilr birleşmesiniň başlygy Nökerguly Atagulyýew we Söwda-senagat edarasynyň başlygy Mergen Gurdow bilen geçiren gepleşiklerinde mälim edildi.
Owgan harytlarynyň sergisi 6-njy marta çenli dowam eder. Serginiň çäklerinde iki ýurduň döwlet edaralarynyň we hususy kärhanalarynyň wekilleriniň gatnaşmagynda işewürler maslahaty hem geçirilýär.
ORIENT news
