Türkmenistanyň bilim ministri Kataryň Bilimler şäheriniň ýolbaşçylary bilen duşuşdy
Bilim ministri Baýramgül Orazdurdyýewanyň ýolbaşçylygyndaky Türkmenistanyň wekiliýetiniň Katar Döwletine amala aşyrýan gulluk-iş saparynyň çäklerinde ýurduň iri bilim merkezi – Bilimler şäheriniň ýolbaşçylary bilen birnäçe duşuşyklar geçirildi. Bu iri ylym-bilim toplumy 12 inedördül kilometr çäkde ýerleşýär.
Saparyň çäklerinde Türkmenistanyň ilçisi Myratgeldi Seýitmämmedowyň, Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýewiň Katar Döwletniň Daşary işler ministrliginiň Diplomatiýa institutynyň direktory Abdulaziz bin Muhammed Al-Hur bilen gepleşikleri geçirildi.
Şeýle hem Türkmenistanyň bilim ministriniň Katar Döwletiniň ýokary okuw toplumlarynyň ýerleşýän ýeri - Bilimler şäheriniň ýolbaşçysy Fransisko Marmaleýo, akademik işler boýunça bölüminiň başlygy Abr Al Halifa we Kataryň Milli kitaphanasynyň başlygy Hamad Al Kawari bilen duşuşyklary geçirildi.
Gepleşikleriň dowamynda taraplar bilim ulgamynda iki ýurtda başlanan özgertmeleri durmuşa geçirmekde has netijeli hyzmatdaşlygy ýola goýmak bilen baglanyşykly meseleleri ara alyp maslahatlaşdylar. Iki dostlukly ýurduň raýatlarynyň arasynda başarnyklary ýokarlandyrmak üçin bilelikdäki bilim, usulyýet, ylmy seminarlar we özara saparlara gyzyklanma bildirildi.
Saparyň çäklerinde türkmen wekiliýeti Bilimler şäheri we Kataryň Milli kitaphanasy bilen ýakyndan tanyş boldular.
ORIENT news
