Kazan şäherinde Türkmenistanyň Prezidentiniň «Ýaşlar – Watanyň daýanjy» atly kitabynyň tanyşdyrylyş dabarasy boldy
2024-nji ýylyň 8-nji fewralynda Kazan şäherinde Türkmeistanyň Russiýa Federasiýasyndaky (Kazan) Baş konsullygynyň guramagynda hormatly Prezidentimiz Serdar Berdimuhamedowyň «Ýaşlar – Watanyň daýanjy» atly kitabynyň tanyşdyrylyş dabarasy boldy.
Çäre Kazan döwlet lukmançylyk uniwersitetinde geçirildi. Oňa RF-de bilim alýan 200-den gowrak türkmenistanly talyp gatnaşdy.
Dabaranyň dowamynda bellenilişi ýaly, ösüp gelýän ýaş nesil baradaky alada Türkmenistanyň döwlet syýasatynyň ileri tutulýan ugurlarynyň biri bolup durýar. Ýurdmumyzyň kanunçylyk binýady, şeýle hem ýaşlaryň ugry boýunça durmuşa geçirilýän taslamalar munuň aýdyň subutnamasydyr. Hormatly Prezidentimiz özüniň «Ýaşlar – Watanyň daýanjy» atly kitabynda bu barada giňişleýin belläp geçýär. 2023-nji ýylyň Türkmenistanda “Arkadag Serdarly bagtyýar ýaşlar” ýyly diýlip yglan edilmeginiň, ýaşlar syýsasty bilen baglanyşykly meseleleriň hormatly Prezidentimiz Serdar Berdimuhamedowyň yzygiderli üns merkezindedigini tassyklaýar.
Hormatly Prezidentimiz «Ýaşlar – Watanyň daýanjy» atly kitaby ýaş türkmenistanlylar üçin gymmat bahaly sowgat we durmuşda ýol görkezijidir. Bu kitabyň hormatly Prezidentimiz Serdar Berdimuhamedowyň Türkmenistanyň Prezidenti wezipesindäki döreden ilkinji eseridigini bellemek gerek, bu bolsa öz gezeginde döwlet Baştutanymyzyň türkmen ýaşlaryna berýän uly ünsiniň subutnamasydyr.
Hormatly Prezidentimiz öz kitabynda türkmen halkynyň taryhy, häzirki güni we geljegi bilen baglanyşykly pikirlerini, ýurdyň Prezidenti wezipesindäki ilkinji günlerinden başlap öz gündeliginde bellik edýändigini aýdýar. Şunuň bilen baglylykda, okyjylar bilen öz pikirlerini paýlaşmak üçin bu kitaby ýazmak kararyna gelendigini belleýär.
Döwlet Baştutanymyzyň ilkinji kitabyny ýaşlar bilen baglanyşykly meselelere bagyşlamagy, ýaşlar syýasatynyň Türkmenistanyň Prezidentiniň hemişe üns merkezinde saklaýandygyna şaýatlyk edýär.
Hormatly Prezidentimiz öz kitabynda watansöýüjiligiň türkmen ýaşlarynyň esasy häsiýeti bolmalydygyny belleýär.
Şunuň bilen baglylykda, dabaranyň dowamynda daşary ýurtlarda bilim alýan talyplaryň öz Watanyna bolan söýgüsini dürli ýollar bilen, şol sanda beýleki halklaryň wekilleriniň arasynda türkmen halkynyň medeniýetine we däp-dessurlaryna mynasyp wekilçilik etmek, ýurdumyzyň ösüşine mynasyp goşant goşmak üçin gowy bilim almak, ylym, bilim, medeni we sport çärelerine işjeň gatnaşmak arkaly beýan edip biljekdikleri bellenildi.
Häzirki wagtda Türkmenistanda Magtymguly adyndaky Ýaşlar guramasy hereket edýär, ýaşlar syýasaty babatda bolsa Türkmenistanyň Bilim ministrligi netijeli iş alyp barýar. Ýurdumyzda “Türkmenistanda ýaşlar baradaky döwlet syýasatynyň 2021-2025-nji ýylar üçin döwlet maksatnamasy” hem-de “Türkmenistanda ýaşlaryň halkara hyzmatdaşlygynyň 2023-2030-njy ýyllar üçin strategiýasy” kabul edildi.
Ýurdumyzda her ýyl «Ýaş alymlaryň bäsleşigi», «Talyp joşguny», «Berkarar döwletiň merdana gerçekleri», «Talyp gözeli», «Ýylyň talyby», «Berkarar döwletiň ylham joşguny» ýaly iri ýaşlar bäsleşikleri geçirilýär.
Ýurdumyzyň halk häkimiýetiniň ýokary wekilçilikli edarasynyň–Türkmenistanyň Halk Maslahatynyň her ýylky mejlisine türkmen ýaşlarynyň köp sanlysynyň çagyrylýandygy nygtaldy. Mundan başga-da, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýaşlar bilen yzygiderli duşuşyklary geçirip durýar.
Häzriki wagtda ýurdumyzyň ähli ministrliklerinde we pudaklaýyn dolandyryş edaralarynda ýaşlar hereketi ornaşdyrylýar. Olar özleriniň täze pikirleri bilen ýurdumyzyň ösüşine mynasyp goşant goşarlar. Meselem, Türkmenistanyň Mejlisiniň deputatlarynyň 32 göterimi 35 ýaşa çenli bolan ýaşlardyr, olaryň 19 göterimi bolsa zenanlardyr. Şunuň bilen baglylykda, ýaş türkmen parlamentarileriniň beýleki ýurtlaryň ýaş parlamentarileri bilen hyzmatdaşlygyna uly ähmiýet berilýär.
Şeýle hem ýurdumyzda ýaş nesil üçin degişli düzümleriň, şol sanda çagalar baglarynyň, mekdepleriň, ýokary okuw mekdepleriniň, sport desgalarynyň we beýlekileriniň yzygiderli gurlup ulanmaga berilýändigi bellenildi. Ýurdumyzyň ýaşlary jaý üpjünçiligi, bank karzlary, ýaşlar kärhanalarynyň salgyt tölegleri babatda dürli ýeňilliklerden peýdalanýarlar.
Türkmen diplomatlary tanyşdyrylyş dabarasynyň jemini jemläp, ýaşlar baradaky aladanyň we olaryň başlangyçlarynyň goldanylmagynyň hormatly Prezidentimiz Serdar Berdimuhamedowyň baştutanlygynda üstünlikli amala aşyrylýan döwlet syýasatynyň ileri tutlýan wezipleriniň biri bolup durýandygyny ýene-de bir gezek bellediler.
Nazarow Aşyraly Bäşimberdiýewiç, Türkmenistanyň Kazandaky Baş konsullygynyň Ikinji sekretary
