Türkmenistanyň Prezidentiniň kitaby Ukrainada tanyşdyryldy
23-nji ýanwarda Türkmenistanyň Ukrainadaky ilçihanasynda Türkmenistanyň Prezidenti Serdar Berdimuhamedowyň «Ýaşlar – Watanyň daýanjy» atly ilkinji kitabynyň tanyşdyrylyş dabarasy geçirildi. Bu barada ilçihananyň metbugat gullugy habar berýär.
Çärä Ukrainanyň ýokary okuw mekdeplerinde okaýan türkmen talyplar, türkmen diasporasynyň wekilleri we diplomatlar gatnaşdylar. Dabarada çykyş edenler Türkmenistanyň Prezidentiniň täze kitabynyň ýaş nesli watançylyk ruhunda terbiýelemekdäki orny barada belläp geçdiler. Ilçihananyň diplomatlary hem öz gezeginde 2023-nji ýylda Türkmenistanyň esasy üstünlikleri barada durup geçdiler we “Arkadag Serdarly bagtyýar ýaşlar” şygary astynda geçen ýylda «Türkmenistanyň ýaşlarynyň halkara hyzmatdaşlygynyň 2023 – 2030-njy ýyllar üçin Strategiýasynyň» durmuşa geçirilmegine ünsi jemlediler. Döwlet Baştutanynyň türkmen ýaşlarynyň durmuş-ykdysady, medeni, ynsanperwer we beýleki ugurlardaky işlerine, gazananlaryna, ýaşlaryň häzirki we geljek nesli üçin ýan kitaby bolup durýandygy bellenildi.
Ýaşlaryň ýurduň ykdysady, syýasy we medeni durmuşyna işjeň gatnaşmagyny üpjün etmekden ybarat bolan Türkmenistanyň Prezidenti tarapyndan alnyp barylýan ýaşlar syýasatynyň ähmiýeti aýratyn nygtaldy.
Soňra çäre talyplaryň aýdym-sazly çykyşlary bilen dowam etdi. Bu çäräniň çygrynda, Gurbanguly Berdimuhamedowyň “Bagt ýoly” goşgusyna milli saz guralda ýerine ýetirilen aýdym çärä gatnaşyjylar tarapyndan joşgun bilen garşylandy.
Bu ýerde guralan sergide türkmen halkynyň Milli Lideri, Halk Maslahatynyň Başlygynyň türkmen we ukrain dillerinde neşir edilen köp sanly kitaplary görkezildi.
ORIENT news
