BAE-de esaslyk maýasy 27 milliard dollar bolan täze kompaniýalar topary dörediler
Birleşen Arap Emirliklerinde esasynda 27 milliard ABŞ dollary bolan maýany dolandyrmak üçin täze kompaniýa dörediler. Ol ykdysadyýetiň dürli ugurlarynda, şol sanda maliýe we dag-magdan ugry boýunça işleri alyp barar. Bu barada “Bloomberg” neşirine salgylanyp, “Report” habarlar portaly mälim edýär.
“2PointZero” atly täze kompaniýa 239 milliard ABŞ dollar pul aýlanyşygy bolan “Abu Dhabi International Holding Co” global maýa goýum kompaniýasynyň dolandyryşynyň astynda bolar.
“2PointZero-nyň” maýasy bölekleýin BAE-niň Prezidentiniň milli howpsuzlyk boýunça geňeşçisi we Prezidentiň dogany Şeýh Tahnun bin Zaýed Al Nahaýýana degişlidir.
Şeýle hem, onuň eýeçiligine 2023-nji ýylyň dekabrynda Zambiýanyň “Mopani” mis känine 1 milliard dollardan gowrak maýa goýan Abu Dabiniň täze “Lunate” gaznasy hem-de “International Resurs Holding” we “Chimera”, “Beltone Finans”, “Citadel Technologies” we “Sagasse Investments” hususy maýa goýum kompaniýalary bar.
“Bloomberg” neşiri Şeýh Tahnun bin Zaýed Al Nahaýýanyň aslynda “Al Nahaýýanlaryň maşgalasynyň işewür lideri” bolandygyny ýazýar. Soňky ýyllarda dünýäniň iň täsirli işewürleriniň birine öwrülen Şeýh Tahnun häzirki wagtda iki gazna, ýurduň iň ýokary karz berijisine öwrülen 300 milliard dollarlyk hususy maýa goýum kompaniýasyna ýolbaşçylyk edýär.
Bellenişine görä, “Abu Dhabi International Holding Co” kompaniýasynyň paýnamalary 3-nji ýanwarda 3,2 göterim ýokarlanyp, soňky 5 aýda iň ýokary derejä ýetdi. Netijede bolsa, kompaniýanyň bazar bahasy 7,5 milliard dollara golaý ýokarlandy.
ORIENT news
