Türkmen talyplary halkara ylmy-amaly maslahatda ýeňiji boldular
Döwletmämmet Azady adyndaky Türkmen milli dünýä dilleri institutynyň talyplary Samara döwlet sosial-pedagogika uniwersiteti tarapyndan "Dil. Medeniýet. Şahsyýet" ady bilen geçirilen ýaş alymlaryň 17-nji halkara ylmy-amaly maslahatynda ýeňiji boldular.
Çärä Russiýanyň we Merkezi Aziýa döwletleriniň 25-e golaý ýokary okuw mekdepleriniň talyplary gatnaşdylar. Onuň çäklerinde geçirilen 18 mejlisde mugallymçylyk, dil we edebiýaty öwreniş we beýleki ugurlara degişli 120-den gowrak çykyşlar edildi.
Döwletmämmet Azady adyndaky Türkmen milli dünýä dilleri institutynyň talyby Daniel Gerbiň "Magtymgulynyň goşgularynyň terjimelerinde türkmençilik däpleri" atly çykyşynda geljek ýylda doglan gününiň 300 ýyllygy bellenjek şahyryň edebiýata goşan aýratynlyklary barada durlup geçilýär. Türkmenistanly talybyň çykyşy uly gyzyklanma bilen diňlenilip, ol maslahatyň 2-nji derejeli diplomyna eýe boldy.
Şol ýokary okuw mekdebiniň talyby Arslan Mämmedow "Ýaşlaryň gepleşikde iň köp ulanýan žargon sözleriniň sözlügi" atly tema boýunça çykyş etdi. Onda rus dilini üstüni doldurýan žargon sözleriniň gelip çykyşynyň esasy ugurlary yzarlanýar. Taslama bu boýunça düşündirişli sözlügi taýýarlamagy hem öz içine alýar. Eminleriň gelen netijelerine görä, onuň çykyşy maslahatyň birinji derejeli diplomy bilen sylaglandy.
Bilelikdäki awtordaşlykda döredilýän sözlüge her bir ulanyjy onlaýn ýagdaýda öz sözlerini girizmäge hödürläp bilerler.
ORIENT news
