Türkmenistanyň, Russiýanyň we Hindistanyň dil öwreniji alymlary "tegelek stol" maslahatyny guradylar
Kazanyň halkara dil sammitiniň çäklerinde Türkmenistanyň, Russiýanyň we Hindistanyň dil öwreniji alymlary "tegelek stol" maslahatyny geçirdiler. Ol Kazanyň Federal uniwersitetiniň Filologiýa we medeniýetara kommunikasiýa instituty tarapyndan guraldy. Bu barada Döwletmämmet Azady adyndaky Türkmen milli dünýä dilleri instituty habar berdi.
Onlaýn görnüşde geçirilen maslahata türkmen tarapyndan rus dili mugallymlar gatnaşdylar. Onda Maýsa Ataýewa "Çagalarda iki dilliligiň ösüşi" atly temada çykyş edip, bu işde goýberilýän esasy säwlikler barada durup geçdi.
Mugallym Gözel Orazmuhammedowanyň çykyşy geljek ýylda doglan gününiň 300 ýyllygy bellenjek Magtymguly Pyragynyň döredijiliginiň leksikasyna bagyşlandy.
Kazanyň Federal uniwersitetiniň Filologiýa we medeniýetara kommunikasiýa instituty Döwletmämmet Azady adyndaky Türkmen milli dünýä dilleri institutynyň iri hyzmatdaşlarynyň biridir. Ýokary okuw mekdepleri birek-biregiň çärelerine işjeň gatnaşýarlar. Bellenişine görä, Kazan şäherindäki uniwersitetde 4 müňe golaý türkmen ýaşlary bilim alýar.
ORIENT news
