Aşgabatda BMG-Habitat-yň wekilhanasyny açmagyň mümkinçilikleri ara alnyp maslahatlaşyldy
Çarşenbe güni, 13-nji dekabrda Aşgabatda Türkmenistan bilen Birleşen Milletler Guramasynyň Ilatly nokatlar boýunça maksatnamasynyň (BMG-Habitat) hyzmatdaşlygy boýunça tegelek stol geçirildi.
Daşary işler ministrliginde geçirilen duşuşyga daşary işler ministriniň orunbasary Mähri Bäşimowa, Gündogar Ýewropa we Merkezi Aziýa boýunça BMG-Habitat-yň sebitleýin geňeşçisi Katýa Şefer, şeýle hem degişli ministrlikleriň we Türkmenistanyň pudak edaralarynyň wekilleri gatnaşdylar.
Çäräniň dowamynda taraplar Türkmenistanda BMG-Habitat-yň wekilhanasyny açmak boýunça mundan beýläkki çäreler barada pikir alyşdylar we hyzmatdaşlygyň hukuk esaslaryny ösdürmegiň zerurdygyny bellediler.
Gatnaşyjylar degişli ministrlikler we Türkmenistan bilen BMG-Habitat-yň arasyndaky hyzmatdaşlygyň ösüş depginini hem bellediler.
Birleşen Milletler Guramasynyň Ösüş maksatnamasy bilen ilatly nokatlar boýunça hyzmatdaşlyk milli şäher syýasatlaryny, düzgünnamalaryny, meýilnamalaşdyryş we dizaýn ýörelgelerini, şäher ykdysadyýeti we maliýe pudagyny has hem ösdürmäge goşant goşýar. Türkmenistan BMG-Habitat-yň ýurtda wekilhanasyny açmaga taýýardygyny 2023-nji ýylda Nýu-Ýorkda geçirilen ýokary derejeli syýasy forumda yglan etdi, şol döwürde DÖM-nyň 11-ni durmuşa geçirmek boýunça Arkadag şäher modeliniň görkezilişi bilen ugurdaş çäre geçirilipdi.
ORIENT news
