Mirziýoýew Türkmenistan bilen ikitaraplaýyn gatnaşyklarda täze taryhy sepgitlere ýetilendigini belleýär
“Şu ýyl ikitaraplaýyn gatnaşyklarymyzda täze taryhy sepgitlere ýetendigimizi we ýokary derejedäki dialogymyzy işjeňleşdirmegiň hasabyna strategik hyzmatdaşlygymyzy pugtalandyrandygymyzy kanagatlanma bilen bellemek isleýärin” diýip, Özbegistan Respublikasynyň Prezidenti Şawkat Mirziýoýew Halkara Bitaraplyk güni mynasybetli Türkmenistanyň Prezidenti Serdar Berdimuhamedowa iberen gutlagynda belledi. Bu barada Türkmenistanyň Döwlet habarlar agentligi mälim edýär.
“Elbetde, biz doganlyk Türkmenistanyň öňdengörüjilikli içeri we daşary syýasatyny, sebitde howpsuzlygy, parahatçylygy, durnuklylygy üpjün etmek, hemmetaraplaýyn gatnaşyklarymyzy çuňlaşdyrmak boýunça möhüm başlangyçlaryny hemişe işjeň goldaýarys” diýip, Özbgeistanyň döwlet Baştutany nygtaýar.
Şeýle hem Şawkat Mirziýoýew özara hormat goýmak, birek-biregi goldamak ýörelgelerine esaslanýan köpugurly we uzak möhletleýin gatnaşyklaryň halklaryň bähbidine mundan beýläk-de depginli ösdüriljekdigine ynam bildirdi.
Özbegistan Respublikasynyň Prezidenti Şawkat Mirziýoýew Halkara Bitaraplyk güni mynasybetli türkmen halkynyň Milli Lideri, Halk Maslahatyň Başlygy Gurbanguly Berdimuhamedowa hem gutlag hatyny iberdi.
ORIENT news
