Türkmenistanyň Prezidenti Gyrgyzystanyň döwlet Baştutanyny gutlady
Türkmenistanyň Prezidenti Serdar Berdimhamedow Gyrgyz Respublikasynyň Baştutanyny Sadyr Žaparowy doglan güni bilen gutlady. Bu barada Döwlet habarlar agentligi mälim edýär.
“Siziň baştutanlygyňyzda Gyrgyz Respublikasynyň syýasy, ykdysady, durmuş we beýleki ugurlarda uly üstünlikleri gazanandygyny bellemek guwandyryjydyr. Häzirki döwürde ýurtlarymyzyň arasyndaky ikitaraplaýyn gatnaşyklar çalt depginde ösýär we täze many-mazmun bilen yzygiderli baýlaşdyrylýar. Döwletara hyzmatdaşlygymyzy ösdürmäge Siziň aýratyn üns berýändigiňiz we ägirt uly goşant goşýandygyňyz üçin minnetdarlygymy bildirýärin” diýlip, gutlag hatynda bellenilýär.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem Gyrgyz Respublikasynyň Prezidenti Sadyr Žaparowa doglan güni mynasybetli tüýs ýürekden gutlaglaryny iberdi.
Halk Maslahatynyň Başlygy Türkmenistan bilen Gyrgyz Respublikasynyň arasyndaky dostlukly gatnaşyklara aýratyn üns berilýändigini belläp, onuň geljekde-de halklarymyzyň bähbidine pugtalandyryljakdygyna ynam bildirdi.
Gurbanguly Berdimuhamedow ýakymly mümkinçilikden peýdalanyp, Prezident Sadyr Žaparowa tüýs ýürekden berk jan saglyk, bagtyýarlyk, Gyrgyz Respublikasynyň halkynyň bähbidine alyp barýan ähli başlangyçlarynda uly üstünlikleri arzuw etdi.
ORIENT news
