Türkmenistanyň Kabuldaky ilçisi Owganystanyň Daşary işler ministrliginiň ýolbaşçysy bilen bilelikdäki taslamalary ara alyp maslahatlaşdy
Türkmenistanyň Kabuldaky ilçisi Hoja Öwezow Owganystanyň Daşary işler ministri Amir Han Muttaki bilen duşuşdy.
Owganystanyň Daşary işler ministrliginiň berýän habaryna görä, bu duşuşykda Owganystan bilen Türkmenistanyň arasyndaky ikitaraplaýyn gatnaşyklar barada maslahatlaşyldy, esasan hem ykdysady meselelere we iki ýurduň arasyndaky möhüm taslamalara aýratyn üns berildi.
Türkmenistan Owganystandaky syýasy we durmuş-ykdysady ýagdaýy durnuklaşdyrmak boýunça halkara tagallalarynyň çäginde işjeň hereket edýär, goňşy ýurda yzygiderli ynsanperwer kömegini iberýär, ol ýerde sosial desgalary gurýar, ilata lukmançylyk kömegini berýär we TOPH gaz geçirijisiniň gurluşygy, TOP elektrik geçirijisi, demir ýollary abatlamak, täze ýollar gurmak we ş.m. ýaly taslamalary durmuşa geçirmek arkaly goňşy ýurduň ykdysady taýdan dikelmegine goşant goşýar.
2017-nji ýylda Aşgabatda gol çekilen degişli ylalaşyga laýyklykda Owganystan - Türkmenistan - Azerbaýjan - Gruziýa - Türkiýe ulag geçelgesi döredildi. Häzirki wagtda bu ulag ýoluny doly güýjünde ulanmak üçin ähli tagallalar edilýär.
ORIENT news
