Aşgabatda geçiriljek “Iran Prože” atly sergä goňşy döwletiň 100 töweregi kompaniýasy gatnaşar
17-19-njy noýabrda Aşgabatda Eýran Yslam Respublikasynyň «Iran Prože» atly ýöriteleşdirilen sergisi geçiriler. Bu barada Türkmenistanyň Söwda-senagat edarasy habar berýär.
Bu ýöriteleşdirilen sergä Eýran Yslam Respublikasyndan ýüze golaý kompaniýasynyň gatnaşmagyna garaşylýar. Esasan gurluşyk we gurluşyk önümleri, tehniki we inženerçilik hyzmatlary, suw hojalygy, energetika, nebit-gaz we nebithimiýa, bilim hem-de söwda ugurlary boýunça işleýän kompaniýalar ellä golaý pawilýonlarda öz sergilik diwarlyklaryny ýaýbaňlandyrarlar.
Şeýle hem 18-nji noýabrda Türkmenistanyň Söwda-senagat edarasynyň binasynda türkmen-eýran işewürler maslahatynyň geçirilmegi meýilleşdirilýär. Bu çäreleriň çäklerinde Türkmenistanyň Senagatçylar we telekeçiler birleşmesiniň agzalarynyň we eýran tarapynyň işewürleriniň arasynda geljekde ýakyn hyzmatdaşlyk saklamak üçin birnäçe resminamalara gol çekilmegine garaşylýar.
ORIENT news
