“Turkish Airlines” we “Emirates” awiakompaniýalary “Airbus” we “Boeing” uçarlaryny satyn alar
Dünýäniň awiasiýa pudagy COVID-19 pandemiýasyndan soň täzeden janlanýar. Munuň şeýledigine Dubaý şäherinde geçirilýän awiasiýa ulaglarynyň halkara sergisiniň çäklerinde özara baglaşylan iri söwda geleşikleri hem şaýatlyk edýär.
Türkiýäniň “Turkish Airlines” awiakompaniýasy bilen dünýäniň iň uly uçar öndürýän kompaniýalarynyň biri bolan “Airbus” kompaniýasynyň arasynda 355 uçary satyn almak barada köp milliard dollarlyk şertnama baglaşyldy.
Şeýlelikde, şertnama lavyklykda, 250 sany A321neo kysymly uçar; 75 sany “A350-900” kysymly uçar; 15 sany A350-1000 görnüşli uçar; 5 sany hem A350F ýük uçary, jemi 345 uçar sargyt edildi. A350-900 kysymly 10 sany uçary eltip bermeklik bolsa ozal ylalaşylypdy.
Umuman alanyňda, “Turkish Airlines” awiakompaniýasy özüniň ösüş strategiýasynyň çäklerinde 600 sany täze uçar satyn almagy meýilleşdirýär.
Dünýädäki iň uly awiakompaniýalaryň ýene biri bolan “Emirates” awiakompaniýasy “Boeing Co.” kompaniýasy bilen uçar satyn almak babatda 52 milliard dollarlyk şertnama baglaşdy. Ylalaşyga gol çekmek dabarasy Dubaýyň şazadasy Şeýh Hamdan bin Muhammet Al Maktumyň gatnaşmagynda geçirildi.
Ylalaşygyň durmuşa geçirilmeginiň çäklerinde Emirlikler 90 sany “Boeing 777” uçaryny satyn alar. Şolaryň 55-si 777-9, 35 sanysy bolsa 777-8 kysymlydyr. Emirlikleriň Baş direktory we ýolbaşçysy Şeýh Ahmed bin Said Al Maktumyň aýtmagyna görä, ozalky sargyt edilen 30 uçaryň üstüne ýene 5 sany “787 Dreamliner” kysymly uçarlar goşular.
"Bu, diňe “Boeing-de” däl, eýsem bütin awiasiýa üpjünçilik zynjyrynda ýüzlerçe müň iş ornuny döretmäge mümkinçilik berýän uzak möhletleýin borçnamadyr" -diýip, Şeýh Ahmed bin Said Al Maktum belledi.
BAE-niň döwlet eýeçiligindäki başga bir “Emirates Group” -yň düzümine girýän “FlyDubai” awiakompaniýasy hem jemi bahasy 11 milliard dollar barabar 30 sany “Boeing 787-9 Dreamliners” uçaryny sargyt etdi. Bu uçarlar awiakompaniýasynyň flotundaky ilkinji uly göwrümli uçar bolar.
Dubaýyň halkara howa sergisinde milliardlarça dollarlyk beýleki şertnamalaryň hem baglaşylmagyna garaşylýar.
Halkara howa ulaglary birleşiginiň mälim etmegine görä, häzirki döwürde halkara howa gatnawlary COVID-19-dan ozalky döwrüň 97 göterimini üpjün edýär.
ORIENT news
