Russiýa Arş giňişligine gazak kosmonawtyny iberip biler
Russiýa we Gazagystan Arş giňişligine gazak kosmonawtyny ibermek mümkinçiliklerini ara alyp maslahatlaşýarlar. Bu barada "Roskosmos-yň" Baş direktory Ýuriý Borisow mälim edýär.
"Roskosmos" gazagystanly kärdeşleri bilen ýakyn aragatnaşyk saklaýar we Baýterek taslamasy ýaly birnäçe taslamalarda olar bilen hyzmatdaşlyk edýär" diýip, döwlet korporasiýasynyň Baş direktory Ýuriý Borisow "Izwestiýa" gazetine beren söhbetdeşliginde aýtdy.
Borisow gazagystanly kosmonawty orbita çykarmak meselesiniň ara alnyp maslahatlaşylýandygyny, munuň üçin ýakyn hyzmatdaşlygyň alnyp barylýandygyny belledi. Ol şeýle hem, Russiýanyň aragatnaşyk hemrasyny döretmek barada Gazagystandan ýüztutma alandygyny mälim etdi.
Mundan başga-da, Borisow “Wostoçnyý” kosmodromyndan adam uçuşlarynyň entek amala aşyrylmandygyny we şeýle uçuşlaryň hemmesiniň Baýkonurdan amala aşyrylandygyny nygtady. “Bütin dünýäniň kosmonawtikasy Baýkonurdan başlandy. Elbetde, muny geljekde hem ösdürmek isleýäris. Onuň özboluşly geografiki ýerleşişi bar" diýip, ol belledi.
Russiýa belarus kosmonawtyny Arş giňişligine ibermek barada hem ozal ylalaşyk baglaşdy. Bu babatda saýlanyp alnan dalaşgärler 2024-nji ýylyň ýazynda meýilleşdirilýän uçuş üçin eýýäm taýýarlyk görýärler.
ORIENT news
