Türkmenistan Russiýa Federasiýasyna täze ilçi belledi
Prezident Serdar Berdimuhamedow Türkmenistanyň Russiýa Federasiýasyndaky diplomatik wekilhanasyna täze ýolbaşçy belledi. Türkmenistanyň Prezidentiniň Permany bilen Batyr Niýazlyýew başga işe geçmegi sebäpli, ýurduň Russiýa Federasiýasyndaky, şol bir wagtda Sloweniýadaky, Serbiýadaky we Bolgariýadaky Adatdan daşary we Doly ygytýarly ilçisi wezipelerinden boşadyldy.
Türkmenistanyň Russiýa Federasiýasyndaky diplomatik wekilhanasynyň ýolbaşçysy wezipesine ozal Halkara ynsanperwer ylymlary we ösüş uniwersitetiniň rektory wezipesinde işlän Esen Aýdogdyýew bellendi. Degişli Permanlara Prezident Serdar Berdimuhamedow anna güni geçirilen Türkmenistanyň Ministrler Kabinetiniň sanly ulgam arkaly geçirilen mejlisiniň barşynda gol çekdi.
Esen Aýdogdyýewiň diplomatik işde ýeterlik iş tejribesi bar. Ol 2014-nji ýyla çenli Türkmenistanyň Awstriýadaky we Şweýsariýadaky ilçisi wezipesinde zähmet çekdi. 2014- nji ýyldan bäri, ol Halkara ynsanperwer ylymlary we ösüş uniwersitetiniň rektory boldy.
ORIENT news
