Türkmenbaşy şäherinde täze elektrik stansiýasy gurlar
Ýakynda Balkan welaýatynyň Türkmenbaşy etrabynyň çäginde guruljak kuwwatlylygy 1574 megawat bolan, utgaşykly dolanyşykda işleýän elektrik stansiýasynyň düýbi tutular. Bu boýunça degişli Karara Prezident Serdar Berdimuhamedow şenbe güni geçen Hökümet mejlisinde gol çekdi.
Ministrler Kabinetiniň mejlisinde wise-premýer Baýmyrat Annamämmedowyň habar bermegine görä, şeýle hem ýurdumyzda bitewi halkalaýyn energetika ulgamyny kemala getirmegiň taslamasyny durmuşa geçirmegiň çäklerinde gurlan Mary — Ahal asma elektrik geçirijisini ulanmaga bermäge taýýarlyk görülýär.
Kuwwatlylygy 1574 megawata deň bolan täze elektrik stansiýasy ýurdumyzda gaz we bug dolanyşygynda işlejek iri energiýa desgasydyr. Prezident Serdar Berdimuhamedowyň bellemegine görä, şeýle döwrebap elektrik stansiýasynyň gurulmagy diňe bir özümizi ygtybarly elektrik energiýasy bilen üpjün etmän, eýsem, bu babatda alyp barýan diwersifikasiýa özgertmelerimiz bilen goňşy ýurtlara, sebite, gerek bolsa, beýleki ýurtlara hem ibermäge taýýarlygy ýene-de bir gezek görkezýär.
ORIENT news
