Fransuz mekdebiniň howlusynda ýene «Uly kir ýuwulşyk» boldy
Däp bolşy ýaly, her ýyl geçirilýän bu aksiýa güni Aşgabat şäherindäki MLF (Mission laïque française) fransuz mekdebiniň howlusynda ýüp çekilip, onda okuwçylar öz suratlaryny, kollažlaryny we applikasiýalaryny asdylar. Bu gezek ähli işler «Suw bilen ýa-da suwsuz» mowzugy bilen birleşdi we her birimizi suwy tygşytly we paýhasly ulanmak, daşky gurşaw meseleleri, global ýylylyk we planetanyň suw baýlyklarynyň hapalanmagy barada oýlanmaga çagyrdy.
Okuwçylar bu mowzuga çaga ýaly sadalyk we şol bir wagtyň özünde jogapkärçilikli we döredijilikli çemeleşdiler. Mekdebiň iň ýaş okuwçylary bir tarapynda suwsuz çöl, guran agaçlar we sary ýapraklar, beýleki tarapdan bolsa açyk ýaşyl öwüsýän ýaşyllyklar we owadan güller bolýan uly göwrümli (3D effektli ýaly!) applikasiýalary ýerine ýetirdiler. Bu iki dünýäniň haýsysynda suw bilen ýa-da suwsyz ýaşarys? Hemme zat özümize bagly.
Başlangyç synp okuwçylary öz eserlerinde älemgoşaryň we daş-töweregimizdäki dünýäniň näderejede ajaýyp bolup biljekdigini, dürli ösümlik we haýwanat dünýäsi bilen tebigatyň nähili ajaýypdygyny görkezdiler. Okuwçylar işlerinde reňk derejesini, şeýle hem kagyzdan kesilen şekil ters fonda goýlanda siluet usuly bilen ulandylar.
Ýokary synp okuwçylary döredijilik işine örän oýlanyşykly çemeleşdiler. Olaryň işine seretseň, «suw ýaşaýyşdyr» diýen meşhur söz bilen akyl taýdan ylalaşýarsyň. Plakatlar sizi pikirlenmäge mejbur edýär: ine, bir wagtlar owadan ada, altyn balygyň ýerine hapa galyndylar ýüzýär. Ýa-da, ynha, suwly näzik akwarium görnüşindäki planetamyzyň şekili. Adamyň aladaly ellerinde ol döwülmez. Ýöne ine, dünýädäki ähli zatlara ýaşaýyş berýän suwyň simwoliki damjasy akýan «jennet suw geçirijisi» …
Çagalaryň ulylaryň möhüm meseleleri barada gürrüň berýän suratlary, daşky gurşawa hormat goýmak meselelerine biperwaý garamaýanlaryň hemmesinde seslenme döretdi. Aşgabatdaky MLF mekdebiniň okuwçylarynyň indi birnäçe ýyl bäri halkara «Uly kir ýuwulşyk» kampaniýasyna gatnaşýandygyny bellemelidiris. Okuwçylar ýylda iki gezek geçirilýän sergi üçin her gezek öz işlerini içgin pikirlenýärler.
Suratkeş Joelle Gontier tarapyndan 2006-njy ýylda açylan halkara sungat gurnamasy häzirki wagtda bäş yklymyň 130 ýurdundan 13 million adamy birleşdirýär. Aksiýanyň geçirilýän güni meýdançalarda, köçelerde we howlularda ýüpler çekilip, oňa suratlar, fotosuratlar we applikasiýalar asylýar. Her aksiýanyň möhüm we wajyp meselelere degýän kesgitli mowzugy bar. Mysal üçin, geçen ýazda geçirilen sergi «Meniň öýüm – seniň öýüň» diýlip atlandyryldy. Indiki «Uly kir ýuwulşyk» 2024-nji ýylyň ýazynda bolar.
ORIENT news
