Brýusselde Merkezi Aziýanyň zenan liderleriniň Dialogyna gatnaşyjylaryň saparyna garaşylýar
Brýussel Merkezi Aziýanyň zenan liderleriniň Dialogyna gatnaşyjylaryň saparyna garaşýar. Geljek aýda, 13-15-nji noýabr aralygynda meýilleşdirilýän bu duşuşyk, Aşgabatda ýerleşýän MA-nyň Öňüni alyş diplomatiýasy boýunça sebit merkezi we ÝB-niň Merkezi Aziýa boýunça ýörite wekili bilen bilelikde gurnalýar.
Çäräniň maksady, “Zenanlar, parahatçylyk we howpsuzlyk” atly global gün tertibini durmuşa geçirmek boýunça ÝB-niň edaralary bilen tejribe alyşmakdyr. Bu tema 23-nji oktýabrda Lýuksemburgda geçirilen Merkezi Aziýanyň we Ýewropa Bileleşiginiň daşary işler ministrleriniň 19-njy duşuşygynyň dowamynda gozgaldy.
Ministrleriň bilelikdäki Beýannamasynda görkezilişi ýaly, duşuşyga gatnaşyjylar, zenanlaryň kararlary kabul etmekde doly we deň gatnaşmagyny mundan beýläk-de üpjün etmegiň möhümdigini bellediler.
Merkezi Aziýanyň zenan ýolbaşçylarynyň Dialogy BMG-niň Öňüni alyş diplomatiýasy boýunça sebit merkeziniň we BMGÖM-nyň goldawy bilen 2020-nji ýylyň dekabrynda resmi taýdan başlanypdy. Zenanlaryň syýasy, ykdysady we jemgyýetçilik durmuşyna gatnaşygyny artdyrmak üçin platforma hökmünde döredildi.
ORIENT news
