Türkmenistanyň milli tennis ýygyndysy öz ýoluna Dewisiň Kubogynda başlaýar
Tennis boýunça Dewisiň Kubogy ugrundaky Aziýa we Okeaniýa zonasynyň IV toparynyň oýunlary Türkiýäniň Antalýa şäherinde geçiriler. Türkmenistanyň hem milli ýygyndysy bu ýaryşlara gatnaşar we III topara girmek üçin bäsleşer. Türkmen tennisçileri ilkinji oýnuny gyrgyzystanly garşydaşlary bilen oýnarlar.
IV topardaky oýunlara jemi iki toparça bölünen 8 topar gatnaşýar. Türkmenistanyň milli ýygyndysy Kuweýt, Gyrgyzystan we Guam toparlary bilen bilelikde “B” toparçada jemlendi. “A” toparçada Siriýa, Yrak, BAE we Singapur toparlary oýnar.
Türkmenistanyň milli ýygyndysyna bäş tennisçi girdi: Meýlis Orazmuhammedow, Ýuriý Rogusskiý, Atlymyrat Gurbanow, Hajy Çaryýew we Gurbanberdi Gurbanberdiýew. Toparyň kapitany we baş tälimçisi Miraly Gasanowdyr.
Türkmenistanyň milli tennis topary Daşkentde (Özbegistan) geçirilen türgenleşik okuwlarynda Dewis Kubogyna taýýarlandylar.
ORIENT news
