Özbegistanda kaşaň otlylarda demir ýol gatnawlary ýola goýlar
Özbegistanda demir ýol gatnawy konsepsiýasy ösdüriler. Ony durmuşa geçirmegiň başlangyjy, ýurduň taryhy şäherleriniň arasynda kaşaň otly Luxury Train Cruising gatnawy bolar.
Sişenbe güni, 17-nji oktýabrda “Özbek demirýollary” we Italiýanyň “Arsenale Group” kompaniýasy tarapyndan bu syýahatçylyk otlusynyň işe girizilmegi barada memoranduma gol çekildi diýip, bu barada Podrobno.uz habar berýär.
Resminama laýyklykda, 2026-njy ýylyň ahyryndan Özbegistanyň taryhy şäherleriniň arasynda hereket edip başlajak kaşaň otly işlenip taýýarlanar. Taslama Özbegistanyň Maýa goýum, senagat we söwda ministrliginiň howandarlygynda amala aşyrylýar.
Italiýanyň kompaniýasynyň Baş direktory Barlettaň pikiriçe, demir ýol gezelençleri syýahatçylygyň geljegi, täze we ekologiýa taýdan arassa syýahat usulydyr.
Ol “Arsenalyň wezipesi, bu gözýetimleri dünýäniň iň tolgundyryjy ýerlerinde mümkin etmek, täze gözýetimleri öwrenmek islegini duruzyp biljek päsgelçilikleriň ýokdugyny subut etmekdir. Bu hyzmatdaşlyga gol çekilmegi bilen syýahatçylaryň otlymyza münüp, bu ajaýyp ýurduň taryhy we medeni baýlyklaryny açyp bilmekleri üçin ýadawsyz işlemäge taýýardyrys "-diýip belledi.
Luxury Train Cruising syýahatçylyk otlusynyň işe girizilmegi Özbegistan we tutuş Merkezi Aziýa sebiti üçin möhüm waka bolar diýlip garaşylýar. Taslama dünýäniň çar künjeginden gelen syýahatçylaryň ünsüni özüne çeker we Özbegistanyň Samarkand, Buhara we Hywa ýaly taryhy şäherleriniň ajaýyp gözelliklerinden lezzet almaga mümkinçilik berer. Otly ýolagçylara syýahat wagtynda iň ýokary amatlylygy üpjün etmek üçin ähli döwrebap şertler bilen üpjün ediler.
Mundan ozal Barletta Ýewropadan Özbegistanyň üsti bilen Hytaýa syýahatçylyk otlusyny işe girizmegi teklip edipdi.
ORIENT news
