Hytaý we Türkmenistan energetika hyzmatdaşlygyny çuňlaşdyrmak barada ylalaşdylar
Hytaý we Türkmenistan energetika hyzmatdaşlygyny çuňlaşdyrmak we ikitaraplaýyn gatnaşyklary ösdürmek barada ylalaşdylar.
Duşenbe güni Pekinde Hytaýyň wise-premýeri Din Sýuesýan Türkmenistandan ýokary derejeli wekiliýet bilen duşuşdy. Duşuşyk sişenbe we çarşenbe günleri geçiriljek «Guşak we ýol» Halkara hyzmatdaşlygyň üçünji forumynyň öňüsyrasynda geçirildi.
Türkmen wekiliýetine Türkmenistanyň Prezidentiniň nebit we gaz boýunça geňeşçisi Aşyrguly Begliýew we wise-premýer, Daşary işler ministri Raşid Meredow girýär.
Din Sýuesýan Hytaýyň döwlet baştutanlary tarapyndan gazanylan möhüm ylalaşygy doly durmuşa geçirmek, energiýa hyzmatdaşlygyny çuňlaşdyrmak we ikitaraplaýyn gatnaşyklary ösdürmek üçin Türkmenistan bilen işleşmäge taýýardygyny aýtdy diýip, Sinhua agentligi habar berýär.
Türkmen tarapy, Aşgabat bilen Pekiniň tebigy gaz pudagyndaky hyzmatdaşlykda öndümli netijelere ýetendigini aýtdy we Türkmenistanyň ikitaraplaýyn energetika hyzmatdaşlygyny çuňlaşdyrmaga we iki ýurduň arasyndaky strategiki hyzmatdaşlygy giňeltmäge taýýardygyny aýtdy.
ORIENT news
