Türkmenistanyň we Türkiýäniň Daşary işler ministrlikleriniň ýolbaşçylary gepleşikler geçirdiler we hyzmatdaşlyk maksatnamasyna gol çekdiler
Türkmenistanyň Daşary işler ministri Raşid Meredow resmi sapar bilen Aşgabatda bolan Türkiýe Respublikasynyň Daşary işler ministri Hakan Fidan bilen gepleşik geçirdi.
Çarşenbe güni, 11-nji oktýabrda geçirilen duşuşykda taraplar iki döwletiň Prezidentleriniň we türkmen halkynyň Milli Lideri, Halk Maslahatynyň Başlygynyň tagallalary netijesinde depginli we üstünlikli ösýän döwletara gatnaşyklarynyň ýokary derejesini bellediler diýip, Daşary işler ministrliginiň metbugat beýanatyna aýdylýar.
Şu gün Türkiýäniň Daşary işler ministrliginiň başlygynyň Prezidentimiz Serdar Berdimuhamedow bilen geçirilen duşuşygyň möhüm ähmiýeti nygtaldy. Onda türkmen-türk hyzmatdaşlygynyň häzirki ugurlary ýene bir gezek kesgitlenildi.
Ministrler syýasy we diplomatik gatnaşyklary mundan beýläk-de ösdürmek, parlamentara hyzmatdaşlygy giňeltmek we hukuk binýadyny berkitmek mowzuklarynda köp meselelere garadylar. Taraplar daşary söwda, energetika, ulag, gurluşyk we senagat, dokma senagatyndaky gatnaşyklary güýçlendirmek barada ylalaşdylar.
Ylym we bilim, sport, saglygy goraýyş, şeýle hem medeni we ynsanperwer alyş-çalyş ugurlarynda üstünlikli özara gatnaşyklar beýan edildi.
Duşuşygyň netijesinde 2024-2025-nji ýyllar aralygynda Türkmenistanyň Daşary işler ministrligi bilen Türkiýe Respublikasynyň Daşary işler ministrliginiň arasynda hyzmatdaşlyk Maksatnamasyna gol çekildi.
ORIENT news
