V Wena baly ilkinji gezek Arkadag şäherinde geçiriler
V Wena baly Arkadag şäherinde 11-nji oktýabrda sagat 18:00-da şäher häkimliginiň binasynyň golaýynda geçiriler. Bu çäre, Awstriýanyň paýtagtynyň meri (häkimi) Mihael Lýudwigiň howandarlygynda Türkmenistanyň Medeniýet ministrliginiň we Daşary işler ministrliginiň goldawy bilen Türkmen-Awstriýa jemgyýeti tarapyndan gurnalýar. Türkmen-Awstriýa jemgyýetiniň başlygy Neda Berger bu barada ORIENT-e habar berdi.
Jemgyýetiň ýolbaşçysy, munuň täze şäherde geçiriljek ilkinji baldygyny, Awstriýadan gelen işewürlik wekilleri, Wena şäher häkimliginiň agzalary, medeniýet we sungat işgärleri, şol sanda döwletiň paýtagtyndaky esasy tans bäsleşiginiň ýeňijisi, häzirki zaman balet tansçysy Demitor Stefaniniň balyň myhmanlary boljakdygyny belledi.
Şeýle hem 12-nji oktýabrda professor Wolfgang Harer we Rasul Klyçewiň ýolbaşçylygynda Türkmenistanyň Döwlet medeniýet merkeziniň Mukamlar köşgünde konsert berjek Türkmen-Awstriýa orkestriniň gelmegine garaşylýar. Çäreleriň dowamynda iki ýurduň işewür toparlarynyň arasyndaky hyzmatdaşlyk meseleleri hem ara alnyp maslahatlaşylar.
Esasy dabaralar Wena şäheriniň meriniň gutlag ýüzlenmesinden soň açylar. Soňra balyň bir bölegi hökmünde Awstriýadan tans toparlary çykyş ederler.
Iň soňky gezek Wena baly 2019-njy ýylda geçirilipdi.
ORIENT news
