Bangladeşiň täze bellenen ilçisi Türkmenistana geldi
Türkmenistanyň daşary işler ministriniň orunbasary Mähri Bäşimowa Bangladeş Halk Respublikasynyň Türkmenistandaky täze bellenen ilçisi M.Amanul Hakdan (oturýan ýeri Ankara şäheri) ynanç hatlarynyň nusgalaryny kabul etdi.
Ministriň orunbasary ilçini jogapkärli wezipä bellenmegi bilen gutlady we türkmen tarapynyň onuň diplomatik işini durmuşa geçirmekde ýardam we goldaw bermäge taýýardygyny nygtady.
Duşuşygyň dowamynda ikitaraplaýyn hyzmatdaşlygyň häzirki ýagdaýy, şeýle hem halkara we sebit guramalaryň çäklerinde özara gatnaşyklaryň mümkinçilikleri ara alnyp maslahatlaşyldy.
Bangladeş Günorta Aziýada ýerleşýän, Demirgazykda, Günbatarda we Gündogarda Hindistan bilen, Günorta-Gündogarda Mýanma bilen serhetleşýän kiçiräk döwletdir. Ykdysadyýetiň soňky ýyllarda ösmegi we uglewodorod serişdelerine talabyň artmagy netijesinde, bu ýurt Türkmenistan – Owganystan – Pakistan – Hindistan gaz geçirijisine gyzyklanma bildirýär.
ORIENT news
