Koreýa Respublikasynyň Prezidenti Türkmenistan bilen hyzmatdaşlygy çuňlaşdyrmagy maksat edinýär
Koreýa Respublikasynyň Prezidenti Ýun Sok Ýol iki ýurduň arasyndaky hyzmatdaşlygy has-da çuňlaşdyrmak maksady bilen türkmen kärdeşi Serdar Berdimuhamedow bilen ysnyşykly hyzmatdaşlyk etmegi meýilleşdirýär. Bu barada Türkmenistanyň Garaşsyzlygynyň 32 ýyllygy mynasybetli iberilen Gutlagda bellenýär diýip, Döwlet habarlar agentligi mälim edýär.
"Koreýa Respublikasy bilen Türkmenistanyň arasyndaky dostlukly gatnaşyklaryň, dürli ugurlardaky netijeli hyzmatdaşlygyň yzygiderli berkeýändigini kanagatlanma bilen belleýärin. Iki ýurduň arasyndaky hyzmatdaşlygy mundan beýläk-de çuňlaşdyrmak maksady bilen, geljek ýyllarda Siziň bilen ysnyşykly hyzmatdaşlyga şatdyryn” diýlip, Gutlagda nygtalýar.
Şeýle hem, Koreýa Respublikasynyň Baştutany ýurduň milli baýramy — Azat ediş gününiň 78 ýyllygy mynasybetli iberilen Gutlag üçin Türkmenistanyň Prezidentine tüýs ýürekden hoşallyk bildirip, berk jan saglyk we bagtyýarlyk, Türkmenistanyň halkyna bolsa mundan beýläk-de gülläp ösüş, rowaçlyk arzuw etdi.
ORIENT news
