Prezidentimiz Serdar Berdimuhamedow ÝB-niň täze ilçisi Beata Peksadan ynanç hatyny kabul etdi
Prezidentimiz Serdar Berdimuhamedow Ýewropa Bileleşiginiň Türkmenistandaky täze ilçisi Beata Peksany kabul etdi. Ol döwlet Baştutanymyza ynanç hatyny gowşurdy we Ýewropa Geňeşiniň başlygy Şarl Mişeliň we Ýewropa Komissiýasynyň Başlygy Ursula fon der Lýaýeniň iberen mähirli salamyny ýetirdi. Şeýle hem, ilçi Prezidentimizi Türkmenistanyň Garaşsyzlygynyň 32 ýyllygy bilen gutlady.
Serdar Berdimuhamedow Ýewropaly diplomat bilen söhbetdeşlikde Türkmenistanyň ÝB bilen daşary syýasatyny durmuşa geçirmekde hyzmatdaşlyga uly ähmiýet berýändigini belledi. Duşuşygyň dowamynda şu ýyl Türkmenistan bilen Ýewropa Bileleşiginiň arasynda diplomatik gatnaşyklaryň ýola goýulmagyna 30 ýyl bolandygy nygtaldy diýip, türkmen döwlet telewideniýesiniň agşamky ýaýlymynda aýdyldy.
Şol geçen ýyllaryň dowamynda däp bolan dostlukly gatnaşyklar üstünlikli ösdürilýär, soňky ýyllarda bolsa ýokary derejede geçirilýän gepleşikler has işjeň häsiýete eýe bolýar.
Türkmenistanyň Prezidenti ýaňy-ýakynda Nýu-Ýork şäherinde BMG-niň Baş Assambleýasynyň 78-nji sessiýasynyň çäklerinde Ýewropa Geňeşiniň Başlygy Şarl Mişel bilen bolan duşuşygynda hyzmatdaşlygyň giň ugurlary boýunça pikir alyşmalaryň bolandygyny nygtady. Ulag ulgamy, energetika we «ýaşyl» tehnologiýalar hyzmatdaşlygyň geljegi uly ugurlarynyň hatarynda görkezildi.
Türkmenistan bilen Ýewropa Bileleşiginiň arasyndaky gatnaşyklar ikitaraplaýyn görnüşde, şeýle hem «Merkezi Aziýa — Ýewropa Bileleşigi» görnüşinde yzygiderli ösdürilýär. Türkmenistanyň Mejlisiniň we Ýewropa Parlamentiniň arasynda parlamentara dialog ýola goýuldy.
Türkmenistanda ylym-bilim, ekologiýa, kanunçylygy kämilleşdirmek, energetika we beýleki ulgamlarda Ýewropa Bileleşiginiň tehniki taslamalary üstünlikli durmuşa geçirilýär.
ORIENT news
