Türkmen wekiliýeti Tokiodaky ykdysadyýet we energetika boýunça ministrleriň ýygnagyna gatnaşdy
«Merkezi Aziýa + Ýaponiýa» dialogynyň çäginde döredilen ministrleriň ykdysady we energetika dialogynyň ilkinji mejlisi çarşenbe güni Tokioda gibrid görnüşde geçirildi. Duşuşykda Türkmenistana «Türkmengaz» döwlet konserniniň başlygy, döwlet ministri Maksat Babaýew wekilçilik etdi.
Şeýle hem, duşuşyga Merkezi Aziýa döwletleriniň energetika we tebigy baýlyklar ministrleri, sebit ýurtlarynyň diplomatik wekilhanalarynyň ýolbaşçylary gatnaşdy. Duşuşyga Ýaponiýanyň Ykdysadyýet, söwda we senagat ministri Nisimura Ýasutoşi ýolbaşçylyk etdi.
Türkmen tarapy howanyň üýtgemeginiň öňüni almak üçin hökümet derejesinde görülýän syýasatlar we çäreler barada habar berdi. Ekologiýa taýdan arassa energiýa çeşmelerine geçmek we zyýanly zyňyndylary azaltmak bilen baglanyşykly meýilleşdirilen taslamalary hödürlediler, şeýle hem hyzmatdaşlyga we Ýaponiýanyň bu ugurdaky tejribesini öwrenmäge taýýardyklaryny mälim etdiler.
Dialogyň netijelerine görä Bilelikdäki Jarnama kabul edildi diýip, türkmen Daşary işler ministrligi habar berýär.
ORIENT news
