“Türkmendeňizderýaýollary” agentliginde YÖB-nyň we Singapur portunyň wekilleri bilen duşuşyk geçirildi
2023-nji ýylyň 18-nji sentýabrynda “Türkmendeňizderýaýollary” agentliginde agentligiň wekilleri bilen Yslam Ösüş Bankynyň (IDB) şeýle hem, Singapur portunyň wekilleriniň arasynda duşuşyk geçirildi.
Mälim bolşy ýaly, Türkmenistanyň hökümeti bilen Yslam Ösüş Bankynyň arasynda baglaşylan şertnama laýyklykda bank Türkmenistanyň milli söwda floty üçin 2 Ro-Pax paromynyň gurluşygyny maliýeleşdirmegi meýilleşdirýär.
Bu taslamanyň çäginde Türkmenbaşy halkara deňiz portunyň potensialyny gowulandyrmak we ösdürmek boýunça grant bermek üçin YÖB bilen şertnama baglaşyldy. Duşuşykda YÖB tarapyndan maliýeleşdirilýän Türkmenistanyň deňiz transportyny ösdürmek taslamasy bilen baglanyşykly meseleler alnyp maslahatlaşyldy.
Maliýeleşdirmegiň esasy maksatlarynyň, ýurdumyzyň gämi gurluşyk pudagyny ösdürmek we höweslendirmek, milli söwda flotuny gowulandyrmak, deňiz transport mümkinçiliklerini ösdürmek, bu ugurda ýokary hünärli hünärmenleri taýýarlamakdygy bellendi.
Duşuşykda Singapur portunyň wekilleri Türkmenbaşynyň halkara deňiz portunyň ösüşi barada portuň potensialyny we bäsdeşlige ukyplylygyny ýokarlandyrmak üçin möhüm taraplary we wezipeleri görkezýän prezentasiýa görkezdiler.
Türkmenistan bilen Singapuryň arasyndaky hyzmatdaşlygyň 2022-nji ýylda başlandygyny we esasy ugurlaryň biri Türkmenbaşy portunda marketingiň ösdürilmegi bolandygyny bellemelidiris. Bu ugurda netijeli işlemek üçin “Türkmendeňizderýaýollary” agentliginiň we Türkmenbaşy halkara deňiz portunyň wekillerinden ybarat ýörite iş topary döredildi. Şeýle usul Singapur portunda-da hem ulanyldy. Taslama, toparyň agzalary üçin Türkmenistana wekilleri çagyrmak we wideo aragatnaşygy arkaly tälim bermek, şeýle hem toparyň agzalarynyň Singapura saparlaryny öz içine alýar. Bu hereketler, taslamanyň üstünlikli durmuşa geçirilmegi üçin kesgitleýji faktor bolup durýan iki ýurduň arasynda bilim alyşmaga we hyzmatdaşlygyň çuňlaşmagyna goşant goşýar.
ORIENT news
