Türkmenistanyň Deňiz söwda floty ýük daşalyşyny 30 göterime golaý artdyrdy
"Deňiz söwda floty" ýapyk görnüşli paýdarlar jemgyýeti ýanwar - awgust aýlarynda ýük daşalyşyny geçen ýylyň degişli döwründäkiden 28,6 göterim artdyrdy. Bu barada kompaniýanyň web-saýtynda habar berilýär.
Geçen 8 aýda dürli görnüşli ýükleriň 1 million 509 müň tonnasy daşaldy. Daşalan konteýner ýükleriň möçberi 2,6 esse ýokarlanyp, jemi 2 773 konteýner birligine barabar boldy.
Ýük dolanyşygy geçen ýylyň 8 aýyndakydan 25,4 göterim ýokarlanyp, jemi 626, 355 million tonna-kilometre deň boldy.
Ýolagçy gatnatmagyň görkezijisi hem 65,5 göterim artyp, 6,194 million ýolagçy-kilometre deň boldy.
Görkezijileriň artmagy ilkinji nobatda çig nebitiň we nebit önümleriniň eksport möçberiniň artmagy we önüm iberijileriň milli flot arkaly ýük ibermäge bolan gyzyklanmalarynyň ýokarlanmagy bilen baglanyşyklydyr.
ORIENT news
