Türkmenistanyň hünärmenleri energiýa tygşytlamak we energiýa netijeliligi boýunça halkara tejribesini öwrendiler
Mary şäherinde okuw seminary geçirildi. Onda Türkmenistanyň hünärmenleri energiýa tygşytlamak we energiýa netijeliligi, şeýle hem gaty hojalyk galyndylaryny alternatiw energiýa çeşmesi hökmünde ulanmak babatynda kadalaşdyryjy hukuk namalaryny we kadalaşdyryjy-tehniki resminamalary işläp düzmekde halkara tejribesini öwrendiler. Bu barada Birleşen Milletler Guramasynyň Türkmenistandaky Ösüş Maksatnamasy (BMGÖM) habar berdi.
Bu seminar BMGÖM bilen Türkmenistanyň Daşky gurşawy goramak ministrliginiň “Türkmenistanyň durnukly şäherleri: Aşgabatda we Awazada ýaşyl şäherleriň toplumlaýyn ösüşi” atly bilelikdäki taslamasynyň çäginde gurnaldy. Bu çärä Türkmenistanyň Energetika ministrliginiň, Türkmenistanyň Döwlet energetika institutynyň (TDEI), TDEI-nyň ýanyndaky “Täzelenýän energiýa çeşmeleri” (RES) ylmy-önümçilik merkeziniň wekilleri, şeýle hem BMGÖM-iň taslamasynyň hünärmenleri we halkara geňeşçileri gatnaşdy.
Seminarda Energetika ministrliginiň, TDEI-nyň we BMGÖM taslamasynyň hünärmenleri bilen bilelikde energiýa netijeliligi we täzelenýän energiýa çeşmeleri boýunça kadalaşdyryjy hukuk namalaryny işläp düzmek boýunça işler geçirildi. Gatnaşanlar halkara ülňüleri we bu ugurdaky öňdebaryjy tejribeler, şeýle hem BMGÖM-iň galyndylary durnukly dolandyrmak we galyndylary täzelenýän energiýa çeşmesi hökmünde ulanmak boýunça alyp barýan işleri bilen tanyşdylar.
Bu seminar, Türkmenistanyň hünärmenleriniň energiýa tygşytlamak we energiýa netijeliligi boýunça hünärlerini ýokarlandyrmaga, şeýle hem bu meseleler boýunça dürli gyzyklanýan taraplaryň arasyndaky hyzmatdaşlygy giňeltmäge ýardam etdi.
ORIENT news
