Baş konsul Tatarystanyň Baştutanynyň ýüzlenmesine gatnaşdy
Türkmenistanyň Russiýa Federasiýasynyň Kazan şäherindäki baş konsuly Güýç Garaýew Tatarystan Respublikasynyň Baştutany Rustam Minnihanowyň 2024-nji ýyl üçin Döwlet geňeşine ýüzlenme çäresine gatnaşdy. Bu barada ýurdumyzyň Kazan şäherindäki diplomatik wekilhanasy habar berýär.
Tatarystanyň Baştutany özüniň çykyşynda geljek ýylyň Respublikada “Ylmy-tehniki ösüşiň ýyly” diýlip yglan edilendigini mälim etdi. Bellenişi ýaly, ylmy-tehniki ösüşde Respublikanyň “Tatneft”, “SIBUR”, “KAMAZ”, “ÝelAZ”, “ElektroOptima” ýaly iri düzümleriniň mynasyp paýy bar.
Rustam Minnihanow geljek ýylda Respublikada geçiriljek iri halkara çäreler barada durup geçdi. Şolaryň hatarynda 20 döwletiň Baştutanlarynyň gatnaşmagynda geçiriljek “BRIKS” we “BRIKS+” guramalarynyň sammiti, “KazanForum” we beýleki çäreler bar.
Türkmenistan Russiýa Federasiýasy, şol sanda onuň subýekti Tatarystan Respublikasy bilen öňden ýakyn hyzmatdaşlyk edip gelýär. Ýurtlar nebithimiýa senagaty, oba hojalygy, maşyngurluşygy ýaly pudaklarda ýakyn hyzmatdaşlyk edýärler.
ORIENT news
