Serdar Berdimuhamedow Singapuryň Prezidentini wezipesine girişmegi bilen gutlady
Türkmenistanyň Prezidenti Serdar Berdimuhamedow Tarman Şanmugaratnamany Singapur Respublikasynyň Prezidenti wezipesine girişmegi bilen gutlady.
Türkmenistanyň Prezidenti gutlag hatynda Tarman Şanmugaratnama jan-saglyk, güýç-gaýrat, şeýle hem Singapuryň halkynyň ýaşaýşynyň gülläp ösmegine gönükdirilen ähli işlerde üstünlikler arzuw edýändigini aýtdy. Bu barada “Watan” habarlar gepleşiginde aýdyldy.
Ondan öň, 13-nji sentýabrda Türkmenistanyň we Singapuryň Daşary işler ministrlikleriniň gurluş bölümleriniň ýolbaşçylarynyň arasynda wideokonferensiýa arkaly maslahat geçirildi. Türkmenistanyň Daşary işler ministrliginiň metbugat gullugynyň habaryna görä, gepleşikleriň dowamynda taraplar ýokary derejede özara saparlary guramagyň zerurdygyny bellediler.
Tarman Şanmugaratnam 1-nji sentýabrdaky Singapuryň Prezident saýlawlarynda 70% -den gowrak ses alyp, ýeňiş gazandy. 2000-nji ýyllaryň başyndan bäri şäher-döwlet hökümetinde bilim, maliýe, durmuş-ykdysady ösüş ministri we premýer-ministriň orunbasary bolup işledi.
ORIENT news
