Milli elektron poçta hyzmatyny ulanyjylaryň sany artýar
"Türkmenaragatnaşyk" agentliginiň hünärmenleriniň işe girizen "Sanly.tm" elektron poçta hyzmatyny ulanyjylaryň sany 38 müň 209-a, korporatiw domenlerine eýelik edýänleriň sany hem 207-ä ýetdi.
"Türkmenaragatnaşyk" agentligi "Sanly.tm" poçta ulgamyny Türkmenistanyň hemişelik Bitaraplygynyň 25 ýyllygyna gabatlap, 2020-nji ýylyň ahyrynda işe girizdi. Ol ýurtda sanly hyzmatlara bolan zerurlyklaryň artmagy esasynda döredildi.
Milli ýörelgeler esasynda işlenip taýýarlanan innowasion önüm arkaly häzirki zaman elektron poçta hyzmatlarynyň ähli mümkinçiliklerini ulanyp bolýar. Onda her ulanyjy üçin 1 gigabaýtlyk elektron poçta gutusy döredilip, kalendar, salgy we bellik kitapçasy elýeterlidir.
"Sanly.tm" ulgamy 3 dilde - türkmen, rus we iňlis dillerinde elýeterlidir. "Türkmenaragatnaşyk" agentliginiň web-saýtynda milli elektron poçta ulgamynda hasaba alynmak üçin edilmeli zatlar ädimme-ädim görkezilendir. Bu ýerde şeýle hem korporatiw poçta gutusyny açmak üçin edilýän hyzmatlar we tarifler bilen tanşyp bolýar.
Agentlik tarapyndan işlenip taýýarlanan "tmchat" we "start" messenjerleri hem uly meşhurlyga eýe bolýar. Häzirki wagtda "start" messenjerini ulanyjylaryň sany 254 müňden geçip, bu san gün-günden ýokarlanýar.
ORIENT news
