Gurbanguly Berdimuhamedow Oleg Kononenko şowly we howpsuz uçuşy arzuw etdi
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Gahrymany, kosmos işi boýunça «Roskosmos» döwlet korporasiýasynyň tälimçi-kosmonawt-synagçysy, kosmonawtlar toparynyň serkerdesi Oleg Kononenko we öz ömrüni kosmonawtika bilen baglan ähli adamlara bütin adamzadyň ösüşine gönükdirilen gaýduwsyz zähmeti üçin tüýs ýürekden minnetdarlyk bildirdi. Bu barada Döwlet habarlar agentligi mälim edýär.
“Men Siziň “TASS” habarlar agentliginiň ýörite habarçysy hökmünde Halkara kosmos stansiýasyna meýilleşdirýän täze kosmos ekspedisiýaňyz baradaky habary watandaşyňyz hökmünde buýsanç duýgusy bilen kabul etdim. Siziň işleriňiziň netijesiniň köp millionly okyjylaryň älem giňişligine akyl ýetirmeginde möhüm maglumat çeşmesi boljakdygyna ynanýaryn” diýip, Gurbanguly Berdimuhamedow hatda belledi.
Mümkinçilikden peýdalanyp, türkmen halkynyň Milli Lideri, Türkmenistanyň Halk Maslahatynyň Başlygy Oleg Kononenko berk jan saglyk, abadançylyk, şowly we howpsuz uçuşy arzuw etdi.
Türkmenistanda önüp ösen Oleg Kononenko kärdeşi Nikolaý Çubow bilen şu gün 15-nji sentýabrda, Aşgabat wagty bilen sagat 20:44-de Arş giňişligine iň dowamly syýahatyna ugraýar. Olar älem giňişligindäki Halkara kosmos stansiýasynda 375 gün bolarlar.
ORIENT news
