Gurbanguly Berdimuhamedow Merkezi Aziýa döwletleriniň Baştutanlaryny 2024-nji ýylda Türkmenistana gelmäge çagyrdy
Gurbanguly Berdimuhamedow Prezident Serdar Berdimuhamedowyň adyndan Merkezi Aziýa döwletleriniň Baştutanlaryny 2024-nji ýylda belleniljek akyldar şahyrymyz Magtymguly Pyragynyň ýubileý baýramy mynasybetli Türkmenistanda geçirilmegi meýilleşdirilýän dabaralara çagyrdy. Bu barada Döwlet habarlar agentligi mälim edýär.
Täjigistanyň paýtagty Duşenbede geçen konsultatiw duşuşynyň dowamyndaky ýörite sylaglamak dabarasynda Gurbanguly Berdimuhamedowa Merkezi Aziýa döwletleriniň Baştutanlarynyň Hormat nyşany gowşuryldy.
Täjigistanyň Prezidenti Emomali Rahmon bu çözgüdiň ýerine düşendigini aýdyp, döwlet Baştutany wezipesinde köpýyllyk netijeli işi bilen hormatly Gurbanguly Mälikgulyýewiç Berdimuhamedowyň doganlyk Türkmenistanda hem, onuň çäklerinden daşarda hem ählumumy hormata, belent abraýa mynasyp bolandygyny nygtady.
Konsultatiw duşuşygyndaky çykyşynda Gurbanguly Berdimuhamedow häzirki döwürde ýönekeý bolmadyk dünýäde ýaşaýandygymyzy, syýasat, ykdysadyýet babatda köp meseleleriň bardygyny, ýöne esasy zadyň — biziň umumy ynsanperwer bähbitlerimiziň göz öňünde bolmalydygyny aýtdy.
Türkmen halkynyň Milli Lideri berlen ýokary sylag üçin ýene-de bir gezek minnetdarlyk bildirip, munuň özi üçin ýokary jogapkärçiligi alamatlandyrýandygyny nygtady we ýurtlarymyzy baglanyşdyrýan dostlukly, hoşniýetli goňşuçylyk gatnaşyklarynyň pugtalandyrylmagyna mundan beýläk-de hemmetaraplaýyn ýardam etjekdigine ynandyrdy.
ORIENT news
